काठमाडौं । स्ट्याण्डर्ड चार्टर्ड बैंक लिमिटेडको ३४औं वार्षिक साधारण सभा पुस २४ गते हुने भएको छ । उक्त सभा एभरेष्ट होटल, नयाँ बानेश्वर, काठमाडौंमा दिउँसो १२ः१५ बजे भर्चुअल माध्यमबाट सम्पन्न गर्ने बैंकले बताएको छ ।
साधारण सभा प्रयोजनको लागि कम्पनीेले पुस ९ गतेदेखि २४ गतेसम्म बुकक्लोज गर्ने भएको छ । त्यसकारण ८ गतेसम्मका कायम शेयरधनीहरुले साधारण सभामा भाग लिन तथा लाभांश लिन पाउनेछन् ।
सभामा हाल कायम चुक्ता पूँजीको ७ प्रतिशत अर्थात प्रति १०० कित्ता शेयरमा नयाँ ७ कित्ता शेयरका दरले बोनस शेयर र कर प्रयोजनका लागि सहित गरी ४ दशमलव ८४ प्रतिशत नगद लाभांश वितरण गर्ने प्रस्ताव रहेको छ ।
त्यस्तै, सभामा गत आर्थिक वर्षको वार्षिक प्रतिवेदन उपर छलफल गरी पारित गर्ने, लेखापरीक्षक नियुक्त गर्ने र निजको पारिश्रमिक स्वीकृत गर्ने, प्रबन्धपत्र तथा नियमावली संशोधनका लागि आवश्यक कार्य गर्न सञ्चालक समितिलाई अख्तियारी दिने लगायतका प्रस्तावहरु पनि पारित गर्ने एजेण्डा रहेको छ ।
