काठमाडौं । सरकारले कोरोना भाइरस संक्रमितको निःशुल्क उपचार नगर्ने निर्णय गरेसँगै अस्पतालहरुले सूचना जारी गरेर पैसा नलिई कोरोना संक्रमितको उपचार नगर्ने घोषणा गर्न थालेका छन् । साथै कतिपय अस्पतालहरुले कोरोना भाइरसबाट संक्रमितहरु भर्ना हुनु परेमा महंगो शुल्क लाग्ने सूचना सार्वजनिक गरिसकेका छन् । कोरोना भाइरसका संक्रमितहरुलाई सरकारले उपचार शुल्क लिने निर्णय गरेसँगै सरकारी अस्पतालहरुले समेत महंगो शुल्क लिन थालेका छन् ।
यसैबीच राजधानी नजिकैको सरकारी स्वामित्वमा सञ्चालित धुलिखेल अस्पतालले कोरोना संक्रमित बिरामी अस्पतालमा ल्याउनु पूर्व कम्तीमा ५० हजार रुपैयाँदेखि दुई लाख रुपैयाँसम्म डिपोजिट राख्नुपर्ने सूचना जारी गरेको छ ।
धुलिखेल अस्पतालले हिजो जारी गरेको सूचनामा सामान्य लक्षण भएका बिरामीको लागि दैनिक ३५०० शुल्क र न्यूनतम ५० हजार रुपैयाँ धरौटी राख्नुपर्ने, मध्यम लक्षण भएकालाई दैनिक ७५०० उपचार शुल्क र न्यूनतम एक लाख रुपैयाँ धरौटी राख्नुपर्ने र पुरै लक्षण देखिएका बिरामीहरुलाई दैनिक १५ हजार रुपैयाँ उपचार शुल्क र न्यूनतम दुई लाख रुपैयाँ धरौटी राख्नुपर्ने सूचना जारी गरेको छ ।
