काठमाडौं । मञ्जुश्री फाइनान्स लिमिटेड र सेञ्चुरी कमर्सियल बैंक लिमिटेडले ऋणपत्र निष्काशन गर्नका लागि नियामक निकाय नेपाल धितोपत्र बोर्डमा निवेदन पेश गरेका छन् ।
मञ्जुश्री फाइनान्स लिमिटेडले ऋणपत्र निष्काशन गर्ने अनुमति माग्दै असोज २१ गते बुधबार सेबोनमा निवेदन पेश गरेको छ । फाइनान्सले ८ वर्ष अवधिको लागि ५० करोड रुपैयाँ बराबरको ‘९.५ प्रतिशत, ८ वर्ष मञ्जुश्री फाइनान्स लिमिटेड डिबेन्चर २०८५’ नाम गरेको ५ लाख कित्ता ऋणपत्र निष्काशन गर्न निवेदन पेश गरेको छ ।
जसमध्ये फाइनान्सले सर्वसाधारणका लागि २ लाख कित्ता र व्यक्तिगत रुपमा विभिन्न संघ संस्थालाई ३ लाख कित्ता बिक्री गर्नेछ । उक्त ऋणपत्र निष्काशन तथा बिक्री प्रबन्धकमा एनआईबिएल एस क्यापिटल रहेको छ ।
सेञ्चुरी कमर्सियल बैंक लिमिटेडले ऋणपत्र निष्काशन गर्ने अनुमति माग्दै असोज २२ गते बिहीबार सेबोनमा निवेदन पेश गरेको हो । बैंकले १० वर्ष अवधिको लागि२ अर्ब २० करोड रुपैयाँ बराबरको ‘९ प्रतिशत ब्याजदरमा १० वर्ष सेञ्चुरी डिबेन्चर २०८७’ नाम गरेको २२ लाख कित्ता ऋणपत्र निष्काशन गर्न निवेदन पेश गरेको छ ।
जसमध्ये बैंकले सर्वसाधारणका लागि ८ लाख ८० हजार कित्ता र व्यक्तिगत रुपमा विभिन्न संघ संस्थालाई १३ लाख २० हजार कित्ता बिक्री गर्ने जनाएको छ । उक्त ऋणपत्र निष्काशन तथा बिक्री प्रबन्धकमा ग्लोबल आइएमई क्यापिटल लिमिटेड रहेको छ ।
