काठमाडौं । यस वर्षको मनसुनको उत्तराद्र्धमा आएको बाढी पहिरो तथा डुबानका कारण करोडौंको धनजनको क्षति भएको छ । देशैभरि पहिरो तथा बाढीका कारण ठूलो भौतिक सम्पत्ति क्षति भएको छ ।
अविरल वर्षाको कारण स्याङ्जाको फरक फरक ठाउँमा गएको पहिरोबाट ज्यान गुमाउनेको संख्या १० पुगेको छ । वालिङ नगरपालिका १४ तमादीमा आज विहानै गएको पहिरोमा परी एकै परिवारका नौ जनाको मृत्यु भएको प्रहरीले जनाएको छ । त्यस्तै कालिगण्डकी गाउँपालिका–४ मा पहिरोले पुरिएर एक जनाको मृत्यु भएको छ ।
यसैबीच, राजधानी ललितपुरको भट्टेडाँडामा पहिरो जाँदा दुई वटा टिपर र एक वटा मोटरसाइकल पुरिएका छन् । सो घटनामा पुरिएका टिपरहरु निकाल्ने क्रम जारी रहेको ललितपुर प्रहरीले जनाएको छ । प्रहरीका अनुसार दुई वटा टिपर र एक वटा मोटरसाइकल कामै नलाग्ने अवस्थामा पुगेका छन् । देशका विभिन्न स्थानमा आएको बाढी पहिरोको कारण करोडौं रुपैयाँको क्षति पुगेको छ भने लाखौं रुपैयाँको बीमा दावी पर्ने देखिएको छ ।
