काठमाडौं । पछिल्लो २४ घण्टामा देशका ११ वटा जिल्लाका ११ जना मानिस कोरोना भाइरसको संक्रमणपछि मृत्यु भएको स्वास्थ्य तथा जनसंख्या मन्त्रालयले जनाएको छ । मन्त्रालयका अनुसार काठमाडौं, ललितपुर, मकवानपुर, बिराटनगर, बारा, रौतहट लगायतका ११ जिल्लाबाट १० जना पुरुष र एक जना महिलाको कोरोना भाइरसबाट मृत्यु भएको छ ।
मन्त्रालयका प्रबक्ता डा. जागेश्वर गौतमका अनुसार एकै दिन ८३८ जनामा कोरोना भाइरसको संक्रमण भएको छ । संक्रमित हुनेहरुमा सबैभन्दा धेरै काठमाडौंका रहेका छन् ।
कोरोना भाइरसबाट मृत्यु हुने र संक्रमितको संख्या बृद्धि भएसँगै आईसियु र भेन्टिलेटरमा उपचार गर्नुपर्ने बिरामीको संख्या समेत बृद्धि हुँदै गएको मन्त्रालयले जनाएको छ । प्रबक्ता गौतमका अनुसार बागमति प्रदेशमा १५ जना भेन्टिलेटरमा राखेर उपचार भइरहेको छ । यसअघि यस्तो संख्या ९ जना मात्रै थियो । कोरोना भाइरसको संक्रमण बढ्दै गएकोले दुई वा एक भन्दा बढि परिवारका सदस्यबीच भेटघाटमा अनिवार्य मास्क प्रयोग गर्न समेत मन्त्रालयले आग्रह गरेको छ ।
