काठमाडौं । रिलायन्स लाइफ इन्स्योरेन्सकोे ६३ करोड रुपैयाँको आइपीओ आज (भदौ ४ गते) बाट बिक्री खुला भएको छ ।
कम्पनीले १ सय रुपैयाँ दरको ६३ लाख कित्ता आइपीओ बिक्री खुला गरेको हो । कम्पनीले बिक्रीमा ल्याएको कुल ६३ लाख कित्ता आइपीओमध्ये ५ प्रतिशत अर्थात ३ लाख १५ हजार सामूहिक लगानी कोषलाई र समान ५ प्रतिशत अर्थात ३ लाख १५ कित्ता कर्मचारीलाई छुट्याइएको छ । बाँकी रहेको ५६ लाख ७० हजार कित्तामा सर्वसाधारणले आवेदन दिन सक्नेछन् ।
कम्पनीको आइपीओमा छिटोमा भदौ ८ गतेसम्म आवेदन दिन सक्नेछन् । उक्त अवधिमा सबै शेयर बिक्रि नभएको खण्डमा भदौ २२ गतेसम्म आवेदन दिन पाइनेछ । कम्पनीको आइपीओलाई इक्रा नेपालले बीबी प्लस रेटिङ प्रदान गरेको छ । यसले कम्पनीको आधारभूत अवस्था औषत रहेको संकेत गर्दछ ।
कम्पनीको आइपीओ बिक्री प्रबन्धकमा सानिमा क्यापिटल रहेको छ ।यसका साथै लगानीर्ताहरुले नेपाल धितोपत्र बोर्डबाट सी–आस्वा अनुमति पाएका बैंक तथा वित्तीय संस्था तथा तिनका शाखा कार्यालयबाट आवेदन दिन सकिनेछ ।
यसका साथै मेरो सेयर सफ्टवेयरबाट पनि आवेदन दिन सकिनेछ । हाल रिलायन्सको चुक्ता पुँजी १ अर्ब ७० करोड रुपैयाँ रहेको छ । आइपीओ बिक्रीपछि यसको चुक्ता पुँजी २ अर्ब १० करोड रुपैयाँ पुग्नेछ ।
कति कित्ता आवेदन दिँदा ठीक ?
धितोपत्र निष्काशन तथा बाडँफाडँ निर्देशिका अनुसार सबैलाई सुरुमा दश÷दश कित्ता दिँदै जानु पर्छ । तर यस कम्पनीले सर्वसाधारणलाई ५६ लाख ७० हजार कित्ता शेयर निष्काशन गरेको छ । यसको अर्थ दश कित्ता नियम अनुसार ५ लाख ६७ हजार जनाले मात्र दश कित्ता शेयर प्राप्त गर्ने छन् ।
यदी ५ लाख ६७ हजार जनाले आवेदन दिएमा सबैले दश कित्ताको दरले शेयर पाउने छन् । ५ लाख ६७ हजार भन्दा धेरैले आवेदन दिएमा दश कित्ताको लागि गोलाप्रथा हुने छ भने ५ लाख ६७ हजार भन्दा थोरैले आवेदन दिएमा सबैले न्युनतम दश कित्ताको दरले शेयर पाउने छन् ।
