काठमाडौं । राजधानी काठमाडौं कोरोना भाइरसको महामारीले भयावह अवस्थातर्फ अघि बढेको छ । टंगालस्थित अख्तियार दुरुपयोग अनुसन्धान आयोगमा कार्यरत थप २२ जनामा कोरोना भाइरस पुष्टि भएको छ । उता, सर्वोच्च अदालतमा बुधबार एक जनामा कोरोना भाइरस पुष्टि भएपछि हिजोदेखि सर्वोच्च अदालतको काम प्रभावित भएको छ ।
राजधानी काठमाडौंमा कोरोना भाइरसको संक्रमण छताछुल्ला भएको भन्दै विज्ञहरुले चिन्ता जनाइरहेकै बेला आज अख्तियारमा थप संक्रमण भेटिएको हो । राजधानीको हटस्पट मानिएको प्रहरी प्रधान कार्यालय नजिकै रहेको अख्तियार दुरुपयोग अनुसन्धान आयोगमा कार्यरत थप २२ जना कर्मचारीमा कोरोना भाइरस पुष्टि भएको छ । यससँगै अख्तियारको काम कारवाही समेत प्रभावित भएको छ । मंगलबार १५ जनामा कोरोना भाइरस पुष्टि भएको अख्तियारमा सबै कर्मचारीको कोरोना भाइरस परिक्षण गर्दा थप २२ जनामा कोरोना पोजेटिभ देखिएको हो ।
उता, सर्वोच्च अदालतमा पहिलो कोरोना केस भेटिएपछि हिजो दिनभर त्यहाँ आतंक मच्चिएको थियो । मंगलबार १८० जनाको स्वाव संकलन गरी परिक्षण गर्दा जगेडा पुलमा रहेका सवारी चालकमा कोरोना भाइरस पुष्टि भएको सर्वोच्च अदालतले जनाएको छ । हाल सर्वोच्च अदालत अघोषित रुपमा सिल गरिएको छ । एक अधिवक्ताले दिएको जानकारी अनुसार हिजोदेखि नै सर्वोच्च अदालत प्रवेशमा कडाई गरिएको छ । सर्वोच्च अदालतका प्रबक्ता भद्रकाली पोखरेलले हिजै एक बक्तव्य प्रकाशित गरी एक जनामा कोरोना पुष्टि भएको जनाएका छन् ।
