काठमाडौं । लाइफ इन्स्योरेन्स कर्पोरेशन नेपाल लिमिटेडको स्वामित्वमा रहेको नागरिक लगानी कोषको संस्थापक शेयरमा गोप्य शिलबन्दी बोलपत्र पेश गर्ने आज अन्तिम दिन रहेको छ ।
कम्पनीले साउन १२ गतेदेखि ५० हजार कित्ता संस्थापक शेयर लिलामीमा विक्री खुला गरेकोे हो । उक्त शेयर खरीद गर्न इच्छुक बैंक तथा वित्तीय संस्था र बीमा कम्पनीहरुले प्रतिकित्ता रू। १ हजार ८०० मा नघट्ने गरी गोप्य शिलबन्दी बोलपत्र पेश गर्नु पर्नेछ ।
शेयर खरीदका लागि न्यूनतम १०० कित्ता वा सो भन्दा माथि १० ले भाग जाने गरी अधिकतममा सम्पूर्ण कित्ताका लागि आवेदन दिन सकिनेछ । बोलपत्र आवेदन फारम विक्री प्रबन्धक नेपाल एसबिआई मर्चेण्ट बैंकिङ लिमिटेड, हात्तिसार काठमाडौं र लाइफ इन्स्योरेन्स कर्पोरेशन नेपालको केन्द्रिय कार्यालय पुतलीसडक काठमाडौंमा प्राप्त गर्न र बुझाउन सकिनेछ ।
त्यस्तै, नेपाल एसबिआई बैंक लिमिटेडको शाखा कार्यालयहरु विराटनगर, बिर्तामोड, वीरगञ्ज, जनकपुर, हेटौंडा, नारायणगढ, पोखरा, बाग्लुङ, बुटवल, दाङ, नेपालगञ्ज, सुर्खेत, धनगढी र महेन्द्रनगरमा पनि आवेदन प्राप्त गर्न र बुझाउन सकिने जनाएको छ ।
