काठमाठौं । मेगा बैंकले आज तुलसीपुर उपमहानगरपालिकामा काउन्टर स्थापना गरेको छ । यससँगै तुलसीपुर उपमहानगरपालिका नगदविहीन अर्थात् क्यासलेस भएको छ । आर्थिक सुशासन र बैंकिङ प्रणालीप्रति अभ्यस्त बनाउन उपमहानगरपालिकामा मेगा बैंकको काउन्टर स्थापना भएपछि क्यासलेस भएको हो । उक्त काउन्टरको उद्घाटन उपमहानगरप्रमुख घनश्याम पाण्डेले गरेका हुन् ।
अब उपमहानगरपालिकालाई तिर्नुपर्ने पैसा सेवाग्राहीले अनिवार्य रुपमा बैंकमा जम्मा गर्नुपर्नेछ । काउन्टर राख्न इच्छुक बैंकबाट आवेदन लिएर बैकलाई काउन्टर स्थापनाका लागि स्वीकृति दिइएको उपमहानगरपालिकाका वित्तीय अधिकृत ललितबहादुर घर्तीले जानकारी दिए ।
गत वर्ष नै काउन्टर उद्घाटन गर्ने भनिए पनि राष्ट्र बैंकसँगको प्रक्रियामा भएको ढिलाइका कारण यस वर्षबाट मात्रै सञ्चालन गर्न सकिएको बैंकको व्यवस्थापक राजन भण्डारीले जानकारी दिए ।
उपमहानगरप्रमुख घनश्याम पाण्डेले अनौपचारिक कारोबारलाई रोक्नका लागि बैंकिङ प्रणालीको ठूलो महत्व हुने र हरेक नागरिकलाई बैंकिङ प्रणालीसँग जोड्न सकिए मात्रै औपचारिक कारोवार वृद्धि हुने बताए ।
