काठमाडौं । किसान माइक्रोफाइनान्स, एनआरएन लघुवित्त र दिव्य लघुवित्तले एक आपसमा मर्जर भई आज मर्जरपछि बनेको नयाँ संस्था एनआरएन लघुवित्तले असार २९ गते सोमबारदेखि एकीकृत कारोबार सुरु गर्दैछ । पश्चात २० करोड ९२ लाख रुपैंया चुक्ता पूँजी भएको एनआरएन लघुवित्त, १० करोड ६६ लाख रुपैंया पूँजी भएको किसान र ७ करोड ७० लाख रुपैंया पूँजी भएको दिव्य लघुवित्त एक आपसमा मर्जरमा जाने सम्झौता गरेका थिए ।
तीन वटै लघुवित्तले एक बराबर एकको अनुपातमा शेयर आदान प्रदान हुने गरी मर्जरको स्वीकृति पाए पछि एकीकृत कारोबार सुरु गर्न लागेका हुन् । मर्जर पछि बनेको नयाँ संस्था एनआरएन लघुवित्तको चुक्ता पूँजी ३९ करोड २८ लाख रुपैंया पुगेको छ । नयाँ लघुवित्तको अधिकृत पूँजी १ अर्ब, जारी पूँजी ५२ करोड पुग्नेछ भने ४२ शाखामा १४२ शाखा बाट लघुवित्त सेवा प्रदान गर्नेछ ।
नयाँ संस्थामा प्रमुख कार्यकारी अधिकृत इन्द्रकुमार शाह हुनेछन् । शाह यस अघि पनि एनआरएन लघुवित्तको प्रमुख कार्यकारी अधिकृत थिए । नयाँ संस्थाको अध्यक्ष प्रमोद उप्रेती हुने छन् । उनी पनि यस अघि एनआरएन लघुवित्तको अध्यक्ष थिए ।
साविकको किसान माइक्रोफाइनान्स मात्र नेपाल स्टक एक्सचेञ्जमा सूचीकृत भएको लघुवित्त हो । एनआरएन र दिव्य सूचीकृत नभएकाले सर्वसाधारण शेयरधनीको हिस्सा मिलाउनका लागि एनआरएन लघुवित्तले मर्जर लगत्तै शतप्रतिशत हकप्रद निष्काशन गरी सर्वसाधारणमा थप नयाँ शेयर निष्काशन गर्ने भएको छ ।
