काठमाडौं । आज बुधबार नेप्से तीन पटक सकारात्मक सर्किट लागेर कारोबार बन्द भएको छ । आज बजार खुलेको १ घण्टा २३ मिनेटमा नेप्से सूचक ६ प्रतिशतले बढेपछि बुधबारका लागि कारोबार बन्द भएको हो। आज नेप्से परिसूचक ७५ दशमलव ७७ अंकले बढेर १३३६.५३ विन्दुमा पुगेको छ।
यसअघि बजार खुलेको १३ मिनेटमा नै नेप्से ४ प्रतिशतले बढेर पहिलो सर्किट लाग्दा २० किनेटका लागि कारोबार रोकिएको थियो भने ११ बजेर ३३ मिनेटमा खुलेको बजार थप ३ मिनेटमै फेरि नेप्से ५ प्रतिशतले बढेपछि पुनः दोस्रो पटक ४० मिनेटका लागि स्थगित गरिएको थियो ।
फेरि, तेस्रोपटक बजार १२ बजेर २४ मिनेट जाँदा नेप्से ६ प्रतिशतले बढेपछि बुधबारका लागि कारोबार बन्द भएको हो ।
आज होटल बाहेक सबै उपसमूहका सूचक बढेका छन् भने नेपाल लाईफको सबैभन्दा धेरै ६ करोड ७६ लाख रुपैयाँको शेयर कारोबार भएको छ। यस्तै ४ करोड ९९ लाखको कुमारी बैंक संस्थापक शेयर, ४ करोड २४ लाखको हिमालयन डिष्टिलरी, २ करोड ५७ लाखको शिवम् सिमेन्टस्को शेयर कारोबार भएको छ। एनआईसी एशिया, एनएमबि बैंक, लागरिक लगानी कोष, नेपाल पुनर्बीमा कम्पनी र नबिल बैंकको पनि १ करोड बढीको कारोबार भएको छ।
