काठमाडौं । राजधानीको ललितपुरस्थित स्टार अस्पतालमा उपचार गराइरहेका एक जना २९ बर्षिय कोरोना संक्रमितको आज विहान मृत्यु भएको छ ।
सानेपामा रहेको स्टार अस्पतालको भेन्टिलेटरमा राखेको केहीबेरमा नै उनको मृत्यु भएको हो । रौतहटका ति पुरुषमा एक्कासी दम लगायतका समस्या देखिएपछि स्टार अस्पतालमा पुर्याइएको थियो । उनको पिसिआर परिक्षणमा पोजेटिभ देखिएको ललितपुर स्वास्थ्य कार्यालयका प्रमुख खगेश्वर गेलालले बताए । यससँगै नेपालमा कोरोनाको संक्रमणबाट मृत्यु हुनेको संख्या २९ पुगेको छ । ति व्यक्तिमा कोरोना कहाँबाट सर्यो भन्ने खोजविन सुरु भएको छ ।
यसैबीच, विश्वभर कोरोना संक्रमितको संख्या एक करोड दुई लाख ४९ हजार नाघेको छ । हालसम्म विश्वभर पाँच लाखभन्दा बढि मानिसको प्राणघातक रोग कोरोनाबाट मृत्यु भएको छ । हालसम्म ५५ लाख ५६ हजार कोरोना संक्रमति निको भइसकेका छन् भने ४१ लाख ८८ हजार भन्दा बढि मानिस अझै कोरोनासँग लडिरहेका छन् ।
त्यस्तै छिमेकी मुलुक भारतमा कोरोना संक्रमितको संख्या आज केही घटेर १९६२० मा झरेको छ । अघिल्लो दिन २० हजारभन्दा बढि कोरोना संक्रमित भेटिएकोमा आइतबार केही घटेको हो ।
