काठमाडौं । सरकारले आगामी असार १ गतेदेखि लागू हुने गरी सबै सरकारी कार्यालय खुल्ला गर्ने निर्णय गरेको छ । हिजो बसेको मन्त्रिपरिषदको बैठकले सरकारी तथा निजी कार्यालय र बैंक, वित्तीय संस्थाका कार्यालय दुई सिफ्टमा सञ्चालन गर्ने निर्णय गरेको सरकारका प्रबक्ता सूचना तथा सञ्चार मन्त्री डा. युवराज खतिवडाले आज पत्रकार सम्मेलनमार्फत जानकारी दिएका छन् ।
मन्त्रिपरिषदको हिजो बसेको बैठकले गैर सरकारी, सार्वजनिक कार्यालय र निजि कार्यालयहरु दैनिक दुई सिफ्टमा सञ्चालन गर्ने निर्णय गरेको हो । यससँगै अब आगामी सोमबारदेखि सबै सरकारी, गैर सरकारी, बैंक वित्तीय संस्थाका तथा निजि कार्यालयहरु खुल्ला हुने भएका छन् ।
सरकारका प्रबक्ता मन्त्री डा. खतिवडाका अनुसार कार्यालय विहान ८ बजेदेखि १ बजेसम्म र १ बजेदेखि बेलुका ६ बजेसम्म सञ्चालन गर्न अनुमति दिइएको छ । कोरोना महामारीबाट बच्न, भिडभाड हुन नदिन, रोकथामका लागि सुरक्षात्मक उपाय अपनाउन र कर्मचारीबीच दूरी कायम गर्न सबै कार्यालयहरुलाई दुई सिफ्ट चलाउने निर्णय गरिएको मन्त्री डा. खतिवडाले बताए ।
त्यसैगरी असार १ गतेदेखि निजि सवारी साधन समेत जोर बिजोर प्रणालीमा आधारित भएर सञ्चालन हुनेछन् । यद्यपि सार्वजनिक सवारी साधन अर्थात बस, माइक्रोबस, ट्याक्सी भने तत्काल सुचारु हुनेछैन । सरकारले शैक्षिक संस्थाका प्रशासन असार १ गते खोल्न अनुमति दिएको छ । यससँगै अब विद्यालय तथा कलेज प्रशासनहरु पनि खुल्ला हुनेछन् । नयाँ भर्नाको लहर चल्ने अनुमान गरिएको छ ।
त्यस्तै होटल तथा रेष्टुरेन्टबाट खाना प्याकिङ गरेर घर लैजान भने पाइनेछ । तर, होटल तथा रेष्टुरेन्ट भने खोल्न पाइने छैन । त्यस्तै अन्तर्राष्ट्रिय उडान सम्बन्धमा कुनै निर्णय भएको छैन ।
सरकारले उल्लेखित व्यवस्था असार २१ गतेसम्म मात्रै लागू हुने जनाएको छ । त्यसपछि पुनः थप गर्ने वा निरन्तर समीक्षामार्फत त्यसअघि नै पनि कुनै पनि बेला पुनः बन्द गर्न सक्ने मन्त्री डा. खतिवडाले बताए ।
त्यसैगरी, सरकारले उद्योग, व्यापार, व्यवसाय, पसल र डिपार्टमेन्ट स्टोर खुला गर्ने निर्णय गरेको छ । तर सपिङ मल भने खोल्न पाइने छैन ।
