काठमाडौं । सारथी लघुवित्त वित्तीय संस्थाले विशेष साधारण सभा आब्हान गरेको छ । संस्थाले नयाँ नेपाल लघुवित्त वित्तीय संस्थासँग मर्जरमा जाने प्रस्ताव पारित गर्नका असार ५ गते विशेष साधारण सभा बोलाएको हो ।
उक्त कम्पनीको जेठ १७ गतेको सञ्चालक समितिको बैठकले मर्जर सम्बन्धि विभिन्न प्रस्ताव पारित गर्न विशेष साधारण सभा गर्ने निर्णय गरेको हो । सभा विहान ८ बजेदेखि दियालो फुडल्याण्ड, बसुन्धरा, काठमाडौंमा शुरु हुने संस्थाले जनाइएको छ ।
यी दुई कम्पनी १ बराबर १ शेयर आदानप्रदान गर्ने सम्झौता अनुसार मर्जरमा जान लागेका हुन् । मर्जर प्रयोजनका लागि नयाँ नेपाल लघुुवित्तको शेयर कारोबार गत माघ २१ गतेदेखि रोक्का रहेको छ ।
संस्थाले मर्जरपश्चात शतप्रतिशत हकप्रद शेयर जारी गर्ने प्रस्ताव पनि सभाका लागि तय गरेको छ । साथै हकप्रदपछि थप साधारण शेयर जारी गर्ने प्रस्ताव रहेको छ ।
विशेष सभाका लागि मर्जर पश्चात् हुने संस्थाको नाम, ठेगाना, अधिकृतपूँजी, जारीपूँजी, चुक्तापूँजी, शेयर संरचना लगायत थप परिवर्तन हुने विषयमा, प्रबन्धपत्र र नियमावलीको तिन महलेमा उल्लेख भए अनुसार आवश्यक नियम संशोधन गर्ने लगायतका विषय रहेका छन् ।
साथै, सभाले आवश्यक सम्पूर्ण कार्यका लागि पूर्ण अख्तियारी सञ्चालक समितिलाई दिनेछ । साधारण सभामा उपस्थित हुन चाहनेहरुले आफ्नो परिचय खुल्ने प्रमाण साथमा लिएर आउनु पर्नेछ ।
हाल सारथी लघुवित्तको चुक्ता पूँजी १३ करोड १६ लाख ६० हजार रुपैयाँ रहेको छ । नयाँ नेपाल लघुवित्तको चुक्ता पूँजी१० करोड ८ लाख रुपैयाँ रहेको छ ।
