काठमाडौं । सरकारले आगामी बर्ष जीवन बीमालाई उच्च प्राथमिकतामा राखेर कूल जनसंख्याको ४० प्रतिशत जनतालाई बीमाको दायरामा ल्याउने घोषणा गरेको छ । आगामी आर्थिक वर्षको बजेट घोषणा गर्दै अर्थमन्त्री डा. युवराज खतिवडाले आगामी आर्थिक वर्षमा ४० प्रतिशत जनतालाई बीमाको दायरामा ल्याउने घोषणा गरेका हुन् ।
सरकारले बीमा क्षेत्रमा घोषणा गरेको निकै महत्वाकांक्षी योजना हुनेछ । हाल बीमाको पहुँच २६ प्रतिशत पुगेको दावी गरिएको छ । गत वर्ष १७ प्रतिशत रहेको बीमाको पहुँच नयाँ कम्पनीको स्थापना तथा बीमाबारे जनचेतना व्यापक भएसँगै उल्लेख्य मात्रामा बृद्धि भएको छ । आगामी वर्ष अझै बृद्धि गर्ने सरकारले घोषणा गरेको छ ।
त्यस्तै, अर्थमन्त्री डा. खतिवडाले स्वास्थ्य बीमा कार्यक्रम प्रभावकारी बनाउने घोषणा गरेका छन् । स्वास्थ्य बीमा कार्यक्रमका लागि सात अर्ब ५० करोड रुपैयाँ बजेट बिनियोजन गरिएको जनाएका छन् ।
