काठमाण्डौ। नेपाल पत्रकार महासङ्घ पर्वतले जिल्लामा कृयाशिल ४१ जना पत्रकारहरुको प्रति पत्रकार १ लाखका दरले बीमा गरेको छ। कोरोना भाइरस (कोभिड–१९) को संक्रमणको जोखिम मोल्दै काम गरिरहेका पत्रकारहरुको नेपाल पत्रकार महासंघले कोरोना बीमा गरेको हो ।
कोरोना संक्रमणको सम्भावना पत्रकारलाई उच्च हुने हुँदा क्रियाशिल पत्रकारहरुको बीमा गरिएको महासंघका अध्यक्ष छविलाल तिवारीले जानकारी दिए । ब्यक्तिगत रुपमा बीमा गरीसकेका बाहेक जिल्लाका ४१ जना क्रियाशिल पत्रकार महासंघका सदस्यहरुको बीमा गरिएको तिवारीको भनाई छ । पत्रकारहरुको अजोड इन्सोरेन्समा बीमा गरिएको अजोड इन्स्योरेन्स पर्वतका कर्मचारी विक्रम ढुङ्गानाले वताए।
बीमा कम्पनीको पछिल्लो नीति अनुसार कोरोना पोजेटिभ पिसिआर विधि मार्फत देखिएमा रु १ लाख बराबरको रकम कम्पनीले सम्बन्धित ब्यक्तिलाई भुक्तानी गर्ने अजोड इन्स्योरेन्स पर्बतका शाखा प्रमुख हरि सुबेदिले जानकारी दिए । जिल्लामा क्रियाशिल सञ्चारकर्मी, पत्रकारहरु रिर्पोटिङमा घर बाहिर निस्कीरहनुपर्ने भएका कारण उनीहरु थप जोखिममा रहेका छन् । महासंघका सचिव गणेश गिरीका अनुसार पत्रकार महासंघले उनीहरुको बीमा गरेको हो ।
