काठमाडौं । बीमा समितिले कोरोना महामारीमा सर्वसाधारणलाई राहत दिने उद्देश्यले ल्याएको कोभिड –१९ बीमा पोलिसीप्रति सर्वसाधारणको आकर्षण जारी छ । कोरोना महामारीकै बीचमा एक लाख ५९ हजार जनाले घरैमा बसेर कोरोना बीमा गराएका छन् । बीमा पुलबाट प्राप्त तथ्याङ्क अनुसार बिहिवार रातिसम्म कूल आठ करोड ६१ लाख ४४ हजार ४८० रुपैयाँ बीमा शुल्क कोरोना बीमा बापत संकलन भएको छ ।
प्राप्त तथ्याङ्क अनुसार १२ हजार ५७८ वटा बीमा पोलिसीमार्फत एक लाख ५९ हजार ९३६ जना व्यक्तिले कोरोना भाइरसविरुद्धमा रक्षावरण लिएका छन् । बिहिवार एकै दिन ४६ लाख रुपैयाँको बीमा पोलिसी काटिएको बीमा पुलले जनाएको छ । बीमा समितिले ५० हजार रुपैयाँ र एक लाख रुपैयाँको दुई वटा बीमा पोलिसी बिक्री गर्न अनुमति दिएको छ ।
