काठमाडौं । नेपाल सरकार मन्त्रिपरिषदको निर्णय अनुसार बीमा समितिले बीमा कम्पनीहरुलाई ३०० वटा सवारी पास वितरण गरेको छ । लकडाउनको अवधीमा अत्यावश्यक सेवा अन्तर्गतका बीमा कम्पनीका दैनिक कार्यालय सञ्चालन गर्न कूल क्षमताको एक चौथाई सवारी साधनलाई पास उपलब्ध गराइएको समितिका उपनिर्देशक निर्मल अधिकारीले बताए ।
कतिपय बीमा कम्पनीहरु अझै पास लिन गइसकेका छैनन् । केही कम्पनीहरुले ‘वर्क फ्रम होम’ अझै कार्यान्वयमा ल्याएका कारण पास वितरण कम भएको हो । नेपालमा सञ्चालित ४० वटा बीमा कम्पनीमा सयौं सवारी साधन छन् । हालसम्म ३०० वटा सवारी साधनका लागि पास वितरण गरिएको र अझै बाँकीलाई आफ्नो विवरण पठाउन भनिएको छ ।
सरकारले गत शुक्रबारदेखि सबै बीमा कम्पनीलाई एक तिहाई कर्मचारीमार्फत आंशिक कार्यालय सञ्चालन गर्ने निर्णय गरेको थियो । बीमा समितिले एक तिहाई कर्मचारीलाई कार्यालयमा ल्याउन सम्पूर्ण सवारी साधनको विवरण लिएर एक चौथाई सवारी साधनलाई पास उपलब्ध गराइएको जनाएको छ ।
