काठमाडौं । कोरोना भाइरसबाट विश्वमा धेरै मानिसको मृत्यु भएको मध्येको एक इटालीमा आजदेखि लकडाउन खुलेको छ । करिब दुई महिना लामो लकडाउनपछि आजदेखि मानिसहरुलाई काममा फर्कन अनुमति दिइएको छ भने बाहिर निस्केर आफ्नो काम गर्न सक्ने गरी खुल्ला गरिएको छ ।
इटालीमा बस, कार र मोटरसाइकलहरु सडकमा गुडेको देखिएको भएपनि गत फ्रेबुअरीमा लकडाउन हुनुअघि भन्दा निकै पातलो भएको अन्तर्राष्ट्रिय समाचार संस्था रोयटर्सले जनाएको छ ।
यद्यपि इटालीको सरकारले आजदेखि सुरक्षित मानिएको क्षेत्रमा रहेको उद्योगहरुलाई सञ्चालन गर्न भनेको छ । त्यस्तै बालबालिकाहरु हिडडुल गर्नको लागि पार्कहरु सचारु गर्न अनुमति दिइएको छ । तर, बाहिर निस्कदा व्यक्तिगत दुरी भने काम गर्नुपर्नेछ ।
इटालीमा लकडाउन खुल्ला गरिएको भएपनि रेष्टुरेन्टहरु मे १८ पछि मात्रै खोल्ने निर्णय गरिएको छ भने विद्यालय, सिनेमा घरहरुको सम्बन्धमा पछि निर्णय गर्ने जनाएको छ । कैयौं मानिसहरु मार्च १२ देखि आज मात्रै घर बाहिर निस्कन पाएको भन्दै निकै खुशी व्यक्त गरेको समेत देखिएको छ ।
कोरोनाको कारण इटालीमा २९ हजारभन्दा बढि मानिसको ज्यान गइसकेको छ । इटाली कोरोनाबाट धेरै मानिसको मृत्यु हुने दोस्रो देश हो । सबैभन्दा धेरै अमेरिकामा मृत्यु हुनेको संख्या ७० हजार पुग्न लागिसकेको छ । इटालीमा फ्रेबरी २१ मा कोरोना भाइरस आउटब्रेक भएको थियो ।
लकडाउन खुलेसँगै बैंक, वित्तीय संस्थाहरु, बीमा कम्पनीहरु पूर्ण रुपमा सञ्चालनमा आएका छन् । झण्डै दुई महिना लामो लकडाउनका कारण इटालमा रहेका २३ वटा बैंक मध्ये ८ वटा बैंकको सम्पत्ति घटेको छ । इटालीमा रहेका एक दर्जन बीमा कम्पनी पनि आजदेखि पूर्ण रुपमा सञ्चालनमा आएका छन् ।
