काठमाडौं । राष्ट्रिय बीमा संस्थानका संचालक तथा कर्मचारीहरुले कोरोना रोकथाम कोषमा ६ लाख रुपैयाँ सहयोग गरेको छ ।
सोमबार संस्थानले विश्वभर महामारीको रुपमा फैलिरहेको कोरोना भाइरसका कारण हुने संक्रमणको रोकथाम, नियन्त्रण र उपचार गर्न नेपाल सरकारले स्थापना गरेको “कोरोना भाइरस संक्रमण रोकथाम, नियन्त्रण तथा उपचार कोष” मा उक्त सहयोग गरेको जनाएको छ ।
उक्त सहयोग रकम संस्थानका सञ्चालकहरुको तर्फबाट एक दिनको बैठक भत्ता,, मुख्य व्यवस्थापक र सो भन्दा माथिका कर्मचारीहरुको शुरु तलब स्केलको सात दिन, व्यवस्थापक, सह–व्यवस्थापक, नायब व्यवस्थापक र सहायक व्यवस्थापक तहका कर्मचारीहरुको शुरु तलब स्केलको पाँच दिन, सहायक “क”, सहायक “ख” र कार्यालय सहयोगी, सवारी चालकहरुको तलब स्केलको तीन दिन बराबरको तलब वापत उक्त सहयोग रकम कोरोना कोषमा प्रदान गरिएको हो ।
संस्थानले यसअघि नै कोरोना कोषमा १ करोड रकम सहयोग गरिसकेको छ ।
