काठमाडौं । कोरोना संक्रमित बढ्दै जाँदा सरकारले लकडाउन थप कडाई गर्ने भएको छ । लकडाउनकै अवधीमा सडकमा बाक्लै गाडी गुड्न थालेपछि सरकारले पास वितरण बन्द गर्ने निर्णय गरेको छ । जिल्ला प्रशासन कार्यालय, काठमाडौंले मृत्यु संस्कारमा सहभागी हुन जानेलाई बाहेक सबै प्रकारको पास वितरण कार्य बन्द गरिएको सूचना टाँसेको छ ।
काठमाडौंका सहायक प्रमुख जिल्ला अधिकारी कृष्णबहादुर राउतले लकडाउन प्रभावकारी पार्न आज बुधबार (वैशाख ३) देखि लागू हुनेगरी सवारी पास वितरण बन्द गरिएको बताए ।
मंगलबारबाट उसले अनलाइनमार्फत ई–पास लिन सकिने व्यवस्था मिलाएको थियो । अत्यावश्यकीय कामका लागि भने पूर्ववत् अनलाइनमार्फत पास वितरण हुने प्रशासनले जनाएको छ ।
त्यस्तै, यसअघि पहेँलो रंगको पास लिएकाले अर्को पास लिन नपर्ने व्यवस्था पनि प्रशासनले मिलाएको छ । सातदिने म्याद राखेर यसअघि वितरित पासको म्याद गुज्रिएपछि प्रशासनले यस्तो व्यवस्था गरेको हो । जिल्ला प्रशासन कार्यालय काठमाडौंले बैंक, वित्तीय संस्था, दुरसञ्चार, आईटी, औषधी सप्लायर्स आदिलाई सयौं पास वितरण गरेको छ ।
