काठमाडौं । मिर्मिरे लघुवित्त वित्तीय संस्था लिमिटेड र शाकाहारी पाटीको संयुक्त पहलमा काठमाडौँ उपत्यकाभित्रका सडक मानव र दैनिक ज्यालादारी गरी जिवनयापन गर्ने मानिसहरुलाई एकदिनको खाना तथा सडकमा छाडा छोडिएका पशुहरुलाई खानेकुरा खुवाइएको छ ।
कोरोना भाइरस ( कोभिड—१९ ) को माहामारीबाट बच्न नेपाल सरकारले पुरै देश नै बन्दाबन्दी गरेको अवस्थामा देशका कल—कारखाना तथा दैनिक काम गर्ने स्थान बन्द भएका कारण दैनिक कमाई गरि खाने मानिसहरु समस्यामा परेका छन् । सोही समस्यालाई मध्यनजर गर्दै संस्थाले बन्दाबन्दीसँगै दैनिकरुपमा समस्यामा परेका ज्यालादारी तथा मजदुरी गरिखाने मानिसहरुलाई संस्थाले शाकाहारी पाटीसँगको सहकार्यमा भोजन गराएको हो ।
संस्थाका प्रमुख कार्यकारी अधिकृत राजेन्द्र प्रसाद न्यौपानेले संस्थाले नियमित कारोवारका अतिरिक्त सामाजिक जनचेतनामूलक कार्यक्रमका साथै विभिन्न समयमा आईपर्ने विपतमा राहतकार्यक्रम समेत गर्दै आइरहेको छ । यो अवस्थामा कोही पनि पैसा नभएको कारणले भोको पेट सुत्न नपरोस् भन्ने मनसायले अझै विभिन्न ठाउँमा कार्यक्रम गर्ने योजना रहेको संस्थाका जनाइएका छन् ।
