काठमाडौं । प्रदेश नं २ सरकारको आज बसेको मन्त्रिपरिषदको बैठकले कोरोना रोगको उपचारमा खटिने स्वास्थ्यकर्मी तथा उनका आश्रित परिवारको कोरोना संक्रमणका कारण मृत्यु भएमा ५० लाख राहत उपलब्ध गराउने घोषणा गरेको छ ।
मुख्यमन्त्री लालबाबु राउतको अध्यक्षतामा बसेको प्रदेश नं २ मन्त्रिपरिषद्को आज सम्पन्न बैठकले कोरोना महामारीको नियन्त्रण, रोकथाम तथा उपचार कार्यमा संलग्न हुने निजामती, अन्य सरकारी कर्मचारी, गैरसरकारी वा निजी क्षेत्रका स्वास्थ्यकर्मी, एम्बुलेन्स चालक र सहयोगी स्वास्थ्यकर्मीको कोरोनाको संक्रमणका कारण मृत्यु भए पीडित परिवारलाई ५० लाख रुपैयाँ राहत स्वरुप उपलब्ध गराउने निर्णय गरेको हो ।
प्रदेश नं २ सरकारका प्रवक्ता एवम् आन्तरिक मामिला तथा कानूनमन्त्री ज्ञानेन्द्रकुमार यादवका अनुसार अस्पतालमा काम गर्ने कर्मचारी, कोरोनाविरुद्धको मोर्चामा खटिने सरकारी कर्मचारी, सुरक्षाकर्मीको मृत्यु भएमा प्रदेश सरकारले नै राहत दिने घोषणा गरेको हो ।
