काठमाडौं । नेपाल सरकार मन्त्रिपरिषदको बैठक केहीबेर अघि सकिएको छ । सामाजिक दुरी कायम गर्दै बसेको मन्त्रिपरषदको बैठकले लकडाउन थप ८ दिन जारी राख्ने निर्णय गरेको प्रधानमन्त्री कार्यालयका सचिव नारायणप्रसाद बिँडारीले बताए । त्यस्तै, कोरोना जाँच्ने पोर्टेल मेशिन प्रदेशहरुमै पठाउने निर्णय भएको छ । कोरोना भाइरसबाट जनतालाई बचाउन सरकारले गत मंगलबार बिहानदेखि घोषणा गरिएको लक डाउनलाई लम्ब्याउँदै चैत्र २५ गतेसम्म पुर्याउने निर्णय गरेको हो ।
आइतबार दिउँसो बसेको कोभिड १९ नियन्त्रण उच्च स्तरीय समन्वयन समितिले लक डाउनको अवधि लम्ब्याउनुपर्ने सिफारिस गरेको थियो । बालुवाटारमा बसेको मन्त्रिपरिषद्को बैठकले चैत्र २५ गतेसम्म देशभर लक डाउन गर्ने निर्णय गरेसँगै सर्वसाधारण अझै एक साता घर बाहिर निस्कन पाउने छैनन् ।
बैठकले क्वारेन्टाईनमा नबसी भागेका विदेशबाट फर्किएकाहरुलाई तत्कालै पक्राउ गरी संक्रामक रोग नियन्त्रण ऐन २०२० अनुसार कारवाही गर्न अर्थात छ महिनासम्म कैदमा राख्न गृहमन्त्रालयलाई निर्देशन दिएको छ ।
