काठमाडौं । कोरोना संक्रमणको आशंकामा आईसोलेशनमा बसेका बिरामीहरुबाट संकलन गरिएको रगत लिन गएको नेपाल एयरलाइन्सको सानो जहाज आज अपरान्ह नेपालगन्जस्थित विमानस्थलमा चिप्लिएर दुर्घटनामा परेको छ ।
घटनामा चालकदलका सदस्य तथा चिकित्सकहरु सकुशल छन् । काठमाडौंबाट नेपालगञ्जका लागि उडान भरेको नेपाल एयरलायन्सको चिनियाँ वाइ–१२ जहाज अवतरणको क्रममा धावनमार्गमा चिप्लिएर दुर्घटनामा परेको हो । विहान ११ः३० बजे अवतरणको क्रममा दुर्घटनामा परेको नागरिक उड्डयन प्राधिकरणले जनाएको छ ।
धावनमार्गबाट चिप्लेको जहाज घाँसै मैदान समेत पार गर्दै झाडीमा पुगेर रोक्किएको छ । कुनै बस्तुसँग नठोक्किएकोले दुर्घटनामा क्षति नभएको जनाइएको छ । उक्त जहाजमा तीन चालक दलका सदस्य र दुई चिकित्सक थिए । सबै सकुशल रहेको नेपालगन्ज विमानस्थलले जनाएको छ । रगतको नमुना सहित चिकित्सक लिन पुनः अर्को जहाज पठाइएको छ ।
