काठमाडौं । विश्वभर फैलिदै गरेको कोरोनाको कारण नेपालमा पनि सरकारले अत्यावश्यक काम बाहेक बाहिर ननिस्कन आह्वान गरेको छ । चौतर्फी आतंकको बीच पेशागत अभिकर्ता संघले अभिकर्ताको लाईसेन्स नविकरण गर्ने म्याद निलम्वन गर्न माग गरेको छ । बीमा ऐनमा प्रत्येक वर्षको चैत्र महिनाभित्रमा बीमा अभिकर्ताको लाइसेन्स नविकरण गर्नुपर्ने व्यवस्था छ ।
संघका अध्यक्ष नन्द प्रसाद तिवारीले बीमा अभिकर्ता तथा सर्भेयर सबैको म्याद कोरोनाको आतंक सकिएको घोषणा गरेको मितिले तीन महिनासम्म थप गर्नुपर्ने बताए । उनले सरकारले नै घरबाट बाहिर ननिस्कन भनेपछि बीमा समितिले सरकारको भावना बुझेर दुवै प्रकारको अभिकर्ता तथा सर्भेयरको म्याद थप हुनुपर्ने बताए ।
उता, बीमा समितिले भने सो सम्बन्धमा कुनै छलफल नभएको बताएको छ । बीमा समितिका सूचना अधिकारी निर्मल अधिकारीले भने, ‘बीमा ऐन र नियमावलीमै नविकरण गर्ने म्याद स्पष्ट रुपमा उल्लेख छ । सो सम्बन्धमा बीमा समितिको बैठकमै छलफल पश्चात ठोस निर्णय हुनसक्छ ।’
