काठमाडौं । सरकारले गभर्नर बन्न योग्यता पुगेका तथा डेपुटी गभर्नरको रुपमा कार्यरत रहेका चिन्तामणि शिवाकोटीलाई नेपाल राष्ट्र बैंकको कामु गभर्नरको जिम्मेवारी सुम्पिएको छ । आजैबाट पदावधि सकिएर बाहिरिएका गभर्नर डा. चिरञ्जीवी नेपालको ठाउँमा नयाँ गभर्नर नियुक्त गर्न नसकेपछि डुपेटी गभर्नरलाई नै कामु गभर्नरको जिम्मेवारी दिएको हो ।
प्रधानमन्त्री केपी ओलीको स्वास्थ्यको कारण गत सोमबार मन्त्रिपरिषदको बैठक बस्न नसकेपछि नयाँ गभर्नर नियुक्त गर्ने प्रक्रियामा ढिलाई भएको हो । नेपाल राष्ट्र बैंक ऐन २०५८ मा गभर्नरको पदावधी सकिनु एक महिना अघि नै नयाँ गभर्नर नियुक्ती गर्नुपर्नेछ भन्ने स्पष्ट उल्लेख छ ।
अर्थमन्त्री डा. युवराज खतिवडाले मंगलबार नै कामु गभर्नरको जिम्मेवारी तोकेर पत्र दिएका छन् । शिवाकोटीको नाम भावी गभर्नरको रुपमा समेत चर्चामा छ । सरकारले यसअघि पनि कामु गभर्नरबाट राष्ट्र बैंक चलाएको उदाहरण छ ।
सरकारले गभर्नर पद रिक्त हुन नदिन कामु गभर्नरलाई जिम्मेवारी दिएको हो । प्रधानमन्त्री ओलीको स्वास्थ्यको कारण नयाँ गभर्नर नियुक्तीमा केही ढिलाई हुनसक्ने बताइएको छ ।
