काठमाडौं । विश्वभर तहल्का मच्चाइरहेको कोरोना भाइरसबाट अमेरिकी राष्ट्रपतिको निवास ह्वाईट हाउसभित्रैका एक जना कर्मचारी संक्रमित भएको आशंकाका स्वयम् क्वारेन्टाईनमा बसेका छन् ।
राष्ट्रपति ट्रम्पका प्रमुख कर्मचारी मार्क मेडोज कोरोना लागेका सांसदसँग भेटघाट गरेपछि स्वयम् क्वारेन्टाईनमा बसेका हुन् । उनीसँगै अन्य चार कानुनी अधिकारी पनि घरैमा स्वयम् क्वारेन्टाईनमा बसेको अन्तर्राष्ट्रिय सञ्चार माध्यम टाईमले जनाएको छ । साथै उसले अमेरिकी राष्ट्रपति डोनाल्ड ट्रम्पको समेत कोरोना परिक्षण गर्नुपर्ने उल्लेख गरेको छ ।
उता, फ्रान्सका संस्कृति मन्त्री फ्रान्क रइस्टर कोरोनाभाइरसबाट ग्रसित बन्न पुगेका छन् । मंगलबार अबेरसम्म कोरोनाबाट संक्रमितको संख्या एक लाख १४ हजार ८०९ जना पुगेको छ भने मृत्यु हुनेको संख्या चार हजार ३१ पुगेको छ । कोरोना सुरु भएको चीनमा केही शिथिल देखिएको कोरोनाको प्रकोप इटाली, इरान तथा दक्षिण कोरियामा भयावह बन्दै गएको देखिएको छ ।
