काठमाडौं । आजको सोमबार विश्वभरका पुँजि बजारका लागि कालो दिनको रुपमा रहने अन्तर्राष्ट्रिय समाचार संस्थाहरुले उल्लेख गरेका छन् । कोरोना भाइरसको कारण विश्वभरको स्टक मार्केट क्र्यास भएपछि आजको दिनलाई कालो दिनको संज्ञा दिन थालिएको छ ।
अमेरिकी स्टक एक्सचेन्ज न्यूयोर्क स्टक एक्सचेन्जको बजार खुलेको केहीबेरमै ७ प्रतिशतले गिरावट आएर सर्किट लाग्न पुगेको छ । न्यूयोर्क स्टक एक्सचेन्जमा १५ मिनेट कारोबार रोकिएको छ । उता, भने बेलायतमा सन् २००८ को संकटजस्तै उच्च गिरावट आएको छ । त्यस्तै चीन, हङ्कङ, कोरिया, जापान तथा भारतीय स्टक मार्केटमा पनि सोमबार उच्च गिरावट आएको छ ।
बेलायती शेयर कारोबारको परिसूचक एफटिएसई१०० को सूचांक ५५० अंकले तल झर्दै ८ प्रतिशतले घटेपछि कालो सोमबारको संज्ञा दिइएको हो । बेलायती स्टक मार्केटमा अहिलेसम्मकै ठूलो गिरावट भएको अन्तर्राष्ट्रिय समाचार एजेन्सीहरुले उल्लेख गरेका छन् । सोमबार केही मिनेटभित्रैमा बेलायती लागनीकर्ताले १४० बिलियन पाउण्डस्टर्लिङ गुमाउन पुगेका छन् ।
त्यस्तै, सोमबार एसियाली बजारमा पनि कोरोनाको असर देखिएको छ । चीनको सांघाई कम्पोजिट इण्डेक्स ३.०१ प्रतिशतले घट्न पुगेको छ । दक्षिण कोरियाको सेयर परिसूचक कोस्पी ४.१९ प्रतिशतले गिरावट आएको छ भने जापानको निक्किई ५.०७ प्रतिशतले घटेको छ । त्यस्तै छिमेकी मुलुक भारतमा झण्ड दुई हजार अंकले शेयर बजार परिसूचक घट्न पुगेको छ ।
उता, इन्धनको मूल्य खाडी युद्धको समयमा झै न्यून बिन्दुमा पुगेको छ । अन्तराष्ट्रिय माध्यम माध्यमहरुले इन्धनको मूल्य खाडीयुद्धको समय १९९१ कै हाराहारीमा पुगेको दावी गरेका छन् । रसिया र साउदी अरेबियाबीचको इन्धन वारको कारण कच्चा तेलको मूल्यमा भारी गिरावट आएको जनाइएको छ ।
