एजेन्सी । भारतको चर्चित एस बैंकभित्र अर्बौ घोटाला गरी डुबाएको आरोपमा बैंकका संस्थापक राना कपुर पक्राउ परेका छन् । उनलाई आइतबार भारतको वित्तीय अपराध सम्बन्धी जाँच एजेन्सीले सम्पत्ति शुद्धिकरण अनुसन्धानका लागि भन्दै पक्राउ गरेको भारतीय सञ्चार माध्यमले जनाएका छन् ।
भारतकै चौथो ठूलो ‘एस बैंक’ को वित्तीय अवस्था कमजोर भएसँगै गत शुक्रबार डुबेको थियो । त्यस लगत्तै भारतीय रिजर्भ बैंकले कारोबारमा अस्थायी प्रतिबन्ध लगाउँदै नियन्त्रणमा लिएको थियो । भारतको केन्द्रीय बैंकले आकस्मिक रुपमा बुधबार मध्यराति उक्त बैंकलाई नियन्त्रणमा लिनुका साथै बैंकबाट ५० हजार भारुभन्दा बढी रकम झिक्न नपाइने गरी प्रतिबन्ध लगाएको थियो । बैंकमा करिब ३० खर्ब निक्षेप रहेको बताइएको छ ।
बैंक संकटमा परेसँगै एटिएम सेवा बन्द छ भने बैंकको काउन्टरमा हजारौं मानिस लामबद्ध भएर रकम निकालिरहेका छन् ।
यसैबीच, बैंकका संस्थापक कपुरकी छोरी बेलायत भाग्दै गरेको अवस्थामा मुम्वई विमानस्थलमा प्रहरीले रोकेको छ ।उनकी छोरी रोशनी कपुर आइतबारको उडानबाट बेलायत जान लागेको अवस्थमा संघीय जाँच ब्यूरोको एजेन्सीले पत्ता पाएपछि विमानस्थलमै रोकिएको हो । सरकारले कपुरका तीन छोरी तथा श्रीमती बिन्दु कपुरमाथि पनि छानविन गरिरहेको जनाएको छ । रोशनी ब्रिटिश एयरवेजको उडानबाट बेलायत उड्दै लाग्दा प्रहरीले रोकेको जनाइएको छ ।
