काठमाडौं । विश्वभर महामारीको रुपमा फैलिएको कोरोना रोगको असर नेपालमा खासै देखिएको त छैन तर अब यसको अप्रत्यक्ष असर काठमाडौंमा देखिन थालेको छ । दैनिक उपभोग्य बस्तुहरु अभाव हुँदै गएको छ । दैनिक उपभोग्य बस्तुहरु भेला पार्नेको भिडभाड किराना पसलमा बढेको छ भने ग्याँस पसलहरुमा लाइन बढ्न थालेको छ ।
बिहिवार विहानैदेखि काठमाडौंका विभिन्न ग्याँस पसलहरुमा सर्वसाधारणको लामो लाइन देखिएको छ । लाइनमा बसेकाहरुले ग्याँस अभाव हुनसक्ने, नेपालमा पनि कोरोना आउन सक्ने भएकाले पूर्व तयारी स्वरुप खाली सिलिण्डर भरेर राख्न ग्याँस किन्न आएको बताइरहेका छन् ।
काठमाडौंमा रोगबाट बच्न लगाउने माक्सको हाहाकार छ भने दैनिक उपभोग्य बस्तुहरुको समेत अभाव सिर्जना हुने संकेत देखा परेको छ । ग्याँसको अभाव हुने डरले मानिसहरुले ग्याँस भण्डारण गर्न थालेको पाइएको छ । घर-घरमा रहेको खाली सिलिण्डर निकालेर ग्याँस भर्न थालेपछि ग्याँसको अभाव हुँदै गएको हो ।
सरकारले दैनिक उभोग्य बस्तुको अभाव नहुने, इन्धन लगायतका आपूर्तिको अवस्था सहज रहेकोले सर्वसधारणलाई नआत्तिन र अनावश्यक बस्तु भण्डारण नगर्न आग्रह गरेको छ ।
संसारभर बिहिवारसम्ममा कोरोनाबाट तीन हजार २९६ जनाको मृत्यु भइसकेको छ भने संक्रमितको संख्या ९५ हजार पुगिसकेको छ । चीनको बुहानबाट फैलिएको कोरानाले अमेरिका, युरोपको इटाली तथा एसियाको इरान र दक्षिण कोरियामा फैलिएपछि नेपालमा त्यसको प्रत्यक्ष असर देखापर्न थालेको हो ।
