काठमाडौं । सन नेपाल लाईफ इन्स्योरेन्स कम्पनीले चालु आवको छ महिनाको वित्तीय विवरण सार्वजनिक गरेको छ । सन नेपाल लाइफको वित्तीय चित्रमा मुनाफामा केही गिरावट आएको देखिए पनि अन्य सूचांकमा भने उल्लेखनीय सुधार गर्न सफल भएको छ ।
सन नेपाल लाईफले जीवन बीमा कोषमा २२९ प्रतिशतले बृद्धि गर्न सफल भएको छ । छ महिनाको वित्तीय विवरण अनुसार कम्पनीले खुद बीमा शुल्क आर्जन ७० प्रतिशतले बृद्धि गर्दै ५६ करोड ८० लाख २३ हजार २८० रुपैयाँ आम्दानी गरेको छ । गत आवको सोही अवधीमा कम्पनीले जम्मा ३३ करोड २७ लाख ९५ हजार मात्रै बीमा शुल्क आर्जन गरेकामा यसवर्ष बीमा शुल्क उल्लेख्य रुपमा बृद्धि गर्न सफल भएको हो ।
त्यस्तै, कम्पनीको कूल बीमा शुल्क आर्जन पनि ५६ करोड ८० लाख २३ हजार २८० रुपैयाँ रहेको छ । गत आवमा कम्पनीको कूल बीमा शुल्क ३५ करोड ५३ लाख ८१ हजार २० रुपैयाँ रहेको थियो । कम्पनीले समीक्षा अवधीमा कम्पनीले पाँच करोड ११ लाख ७५ हजार रुपैयाँ मुनाफा आर्जन गरेको छ । अघिल्लो आवमा कम्पनीले छ करोड ५३ लाख ११ हजार रुपैयाँ मुनाफा आर्जन गरेको थियो । यद्यपि जीवन बीमा कम्पनीहरुको मुनाफा भने लेखा परिक्षणको क्रममा बीमाङ्कीय मूल्याङ्कनको आधारमा निकै तलमाथी हुने गर्दछ ।
कम्पनीले छ महिनामा आठ हजार नौ सय ३६ वटा नयाँ पोलिसी बिक्री गरेर तथा ४५ हजार ३६८ वटा पोलिसी नविकरण गरी उल्लेखित बीमा शुल्क आर्जन गर्न सफल भएको हो । अघिल्लो आवको असोज ६ गतेबाट मात्रै कारोबार गरेका कारण पनि सन नेपाल लाईफको वित्तीय विवरणको तुलनात्मक अध्ययनमा यस वर्ष निकै राम्रो देखिन आएको छ ।
एक अर्ब ४० करोड रुपैयाँ चुक्ता पुँजि रहेको जीवन बीमा कम्पनीले बीमा व्यवसायबाट छ महिनामा १० करोड रुपैयाँ नेपाल सरकारलाई कर समेत तिरेको छ ।
