काठमाडौं । बीमा समितिले आफू मातहत रहेका बीमा कम्पनीहरुको कार्यालयबाटै नियमन गर्ने भएको छ । बीमा कम्पनीहरुलाई जोखिमको विश्लेषण गरेर समितिले अब कार्यालयबाटै नियमन गर्न लागेको हो । तथ्याङ्कमा आधारित जोखिम विश्लेषण गरी सोही आधारमा बीमा कम्पनीहरुलाई नियमन गर्न लागेको बीमा समितिका कार्यकारी निर्देशक राजुरमण पौडेलले बताए ।
बीमा समितिले कम्पनीहरूको नीतिगत तथा सञ्चालनको सम्बन्धमा तथ्याङ्क संकलन गरी सुक्ष्म निगरानी गर्नेछ । सो निगरानीको बखत आवश्यक परेका बेला बीमा कम्पनीहरुलाई निर्देशन दिने बाटो खुल्ला गर्न बीमा समिति आन्तरिक निर्देशिका बनाई लागू गरेको जनाएको छ । केही अघि बसेको बीमा समितिको बोर्ड बैठकले सो कार्यविधि स्वीकृत गरेको बीमा समितिका सूचना अधिकारी निर्मल अधिकारीले बताए । समितिले ‘जोखिममा आधारित गैरस्थल सुपरिवेक्षण कार्यविधि २०७६’ पारित गरेको छ ।
सोही कार्यविधिको अधिनमा रहेर बीमा कम्पनीहरु अब कार्यालयबाटै नियमन हुनेछन् । हरेक बीमा कम्पनीहरुले पठाउने तथ्याङ्कहरुको कार्यालयबाटै सुक्ष्म विश्लेषण गरी जोखिमको अवस्थाको नियमित अनुगमन हुने बीमा समितिले जनाएको छ । कम्पनीहरुको जोखिम नियमन गर्न नयाँ व्यवस्था लागू गरिएको बीमा समितिको भनाई छ । बीमा समितिले बीमा कम्पनीले लगानी गर्ने ऋण, तरलता, दावी भुक्तानी आदि क्षेत्रमा हुने जोखिमको विश्लेषण गरी सोही बमोजिम जोखिमको थ्रेसहोल्डभन्दा माथि हुने वित्तिकै सुधारको लागि निर्देशन दिनेछ ।
