काठमाडौं । यही माघ १ गतेदेखि सञ्चालनमा आएको तेस्रो पक्ष बीमा पुलको कार्यविधि अनुसारको मोडालिटी अधुरै रहँदा पुल व्यवस्थापक भनिएको पुनर्बीमा कम्पनी अन्योलमा परेको छ ।
तेस्रो पक्ष बीमा पुलमार्फत सञ्चालन गर्ने घोषणा गरेको एक साता वितिसक्दा पनि मोडालिटी तयार नहुँदा तेस्रो पक्ष बीमा गरेका कम्पनीका कर्मचारीहरु समेत अन्योलमा परेका छन् । मोडालिटी तयार नहुँदा तेस्रो पक्ष बीमा पुलको काम औपचारिक रुपमा सुरु हुन सकेको छैन ।
नेपाल बीमक संघको नेतृत्वमा कार्यविधि बनाई यही माघ १ गतेदेखि तेस्रो पक्ष बीमा पुलमार्फत सञ्चालन गर्ने निर्णय गरेको थियो । सो सम्बन्धमा सबै बीमा कम्पनीहरुलाई निर्देशन दिएको भएपनि मोडालिटीका कारण पुनर्बीमा कम्पनीसँग सम्झौतामा ढिलाई भएको छ ।
एक सातामा कम्पनीहरुले ठूलो रकम बीमाशुल्क बापत उठाई सकेका छन् । तेस्रो पक्ष बीमापुलको काम समयमा सुरु नहुँदा दावी भुक्तानीमा समस्या पर्ने देखिएको छ ।
माघ १ गते यता बीमाशुल्क भुक्तानी गरी दुर्घटनामा परेकाले दावी भुक्तानीका लागि आएको अवस्थामा के गर्ने ? को जिम्मेवार हुने ? समस्या परेको एक बीमा कम्पनीका सिईओले इन्स्योरेन्स खवरलाई बताए ।
उता, पुनर्बीमा कम्पनीका डेपुटी सिईओ दामोदर भण्डारीले तेस्रो पक्ष बीमा पुल व्यवस्थानको काम गर्ने भनिए पनि आजको मितिसम्म सम्झौता नभएको बताए ।
सम्झौता गर्न ढिलाई हुँदा पुनर्बीमा कम्पनी समेत अन्योलमा परेको स्रोतले जनाएको छ । तेस्रो पक्ष बीमा मोडालिटी तयार गर्न केही ढिलाई भएपनि लागू गरेरै छोड्ने नेपाल बीमक संघले जनाएको छ ।
