जनकपुर । माघे संक्रान्ती मनाउन भन्दै मोटरसाईकलमा हुईकिएका दुई युवामा सवारी दुर्घटनामा मृत्यु भएको छ । हेलमेट समेत नलगाई विपरित दिशाबाट अपाचे मोटरसाईल कुदाएर हिडेका धनुषाका दुई युवा सवार ज१०प ३५३५ नम्बरको मोटरसाइकल मंगलबार साँझ स्थानीय विद्यालयको बसमा ठोक्किएर दुर्घटनामा परेको हो ।
अत्याधिक गतिमा रहेको मोटरसाइकल दुर्घटनामा बसलाई प्वाल पारेर मोटरसाइकल नै भित्र छिरेको छ । ज १ क २८२ नम्बरको जनकपुर मल्टिपल कलेजको बससँग ठोकिएर भएको दुर्घटनामा धनुषा क्षिरेश्वरनाथ नगरपालिका–९ पर्सा पकडियाका अकबर राइनका जेठा छोरा २० वर्षका मुबारक राइन र पछाडि बसेका युवक बिल्टु ठाकुरका एकमात्र छोरा २१ वर्षका सन्तोष ठाकुर छन् । दुवैको घटनास्थलमै मृत्यु भएको हो ।
घटनापछि मृतकका आफन्तले बसलाई आगो लगाएर जलाएका छन् । जिल्ला प्रहरी कार्यालय धनुषाका प्रहरी निरीक्षक अशोक झाले घटनाको सम्बन्धमा अनुसन्धान भइरहेको बताए ।
दुई युवाहरु माघे सक्रान्ती मनाउने भन्दै मोटरसाइकल लिएर हिडेका थिए । माघे संक्रान्तिकै अघिल्लो दिन दुर्घटनामा ज्यान गएपछि परिवार शोकमा डुबेको छ । विद्यालयको बसमा समेत आगो लगाई क्षति पुगेकोले उक्त घटनाको बीमा दावी पर्ने देखिएको छ ।
