काठमाडौं । बीमा समितिले बैदेशिक रोजगारीमा विदेश जाने नेपाली कामदारका लागि गरिदै आएको म्यादी बीमाको पुल व्यवस्थापक चार कम्पनीहरुलाई कम्प्युटरमार्फत स्वचालित प्रणालीद्वारा बीमा गर्ने व्यवस्था मिलाउन निर्देशन दिएको छ ।
म्यादी बीमा पुलको व्यवस्थापन गर्दै आएका गुराँस लाईफ इन्स्योरेन्स कम्पनी, नेशनल लाईफ इन्स्योरेन्स कम्पनी, युनियन लाईफ इन्स्योरेन्स कम्पनी र रिलायबल नेपाल लाईफ इन्स्योरेन्स कम्पनीलाई बुधबार एक निर्देशन जारी गर्दै बीमा गर्न चाहने व्यक्तिले अनलाईनबाट सजिलै भुक्तानी गर्न सकिने गरी व्यवस्था मिलाउन निर्देशन दिएको हो ।
कार्यकारी निर्देशक राजुरमण पौडेलेद्वारा निर्देशनमा बैदेशिक रोजगार म्यादी बीमाको लागि बैदेशिक रोजगार विभागमा समन्वय गर्न समेत भनिएको छ ।
पुललाई व्यवस्थित गर्ने प्रयासमा रहेको बीमा समितिले अनलाईनमार्फत भुक्तानी गर्ने व्यवस्था गर्न भनेपनि स्वचालित रुपमा बीमा कसरी गर्ने भन्ने सम्बन्धमा कम्पनीहरुले ठोस योजना बनाइसकेका छैनन् । स्वचालित रुपमा डाटा इन्ट्री गरी कामदारहरुको विवरण अनलाईनमा प्रविष्ट गरेपनि रकम भुक्तानीको व्यवस्थाको लागि भने केही झन्झटिलो हुने बीमा पुलको व्यवस्थापन गर्दै आएका एक कम्पनीका अधिकारीले बताए ।
