काठमाडौं । एनएमबि बैंकको आज बिहीबारबाट नेप्सेमा सेयर कारोबार खुला भएको छ । ओम डेभलपमेन्ट बैंकसँग मर्जर प्रक्रिया सम्पन्न गरेपछि दोस्रो बजारमा पनि सेयर कारोबार खुला गरिएको हो ।
पहिलो कारोबारका लागि नेप्सेले ओपन रेन्ज समेत तोकेको छ । जस अनुसार बिहीबार एनएमबिको प्रतिकित्ता ३५१ रुपैयाँलाई आधार मानेर सेयर कारोबार खुलेको छ ।
दुवै बैंक मर्जर भएर गत असोज ११ गतेदेखि एकीकृत कारोबार सुरु भएको थियो । एकीकृत कारोबारका लागि राष्ट्र बैंकले असोज १ गते र कम्पनी रजिष्ट्रारको कार्यालयले असोज ५ गते अन्तिम स्वीकृति दिएको थियो ।
यस्तै, एनएमबिको साउन २८ गते बसेको विशेष साधारण सभा र ओमको साउन २७ गते बसेको वार्षिक साधारण सभाले मर्जर प्रस्ताव अनुमोदन गरेको थियो । एनएमबि र ओमबीच १००ः७६ अनुपातमा मर्जर भएको हो ।
नेप्सेमा एनएमबि बैंकको १ करोड ९१ लाख १५ हजार ७९०।५६ कित्ता सेयर सूचीकरण समेत भएको छ । एनएमबि र ओम मर्जरपछि कायम रहेको सेयर सूचीकरण गरिएको हो ।
