काठमाडौं । सम्पत्ति शुद्धिकरण विभाग अनुसन्धानले बीमा क्षेत्रमा कालोधन भित्रन सक्ने भन्दै सचेतता देखाएको छ । विभागले गत कार्तिक ७ गते ४० वटै बीमा कम्पनीका प्रतिनिधिहरुलाई बोलाएर प्रशिक्षण दिँदै कालोधन रोक्न निर्देशन दिएको छ । बीमा समितिका अनुसार विभागका उच्च अधिकारी नै सहभागी भएर ४० वटै बीमा कम्पनीका प्रतिनिधिहरुलाई राखेर प्रशिक्षण दिएको हो । विभागले सम्पत्ति शुद्धिकरण निवारणको लागि ऐन र निर्देशिका पालना गर्न सबै बीमा कम्पनीलाई निर्देशन दिएको छ ।
कुपण्डोलस्थित बीमा समितिको सभाहलमा गत साताको बिहिबार आयोजित कार्यक्रममा विभागका अधिकारीले बीमा क्षेत्रमा आउने सक्ने कालोधन रोक्ने बारेमा आवश्यक प्रशिक्षण दिइएका हुन् ।
प्रशिक्षणमा ३९ वटा बीमा कम्पनी तथा एक वटा पुनर्बीमा कम्पनीका सम्पत्ति शुद्धिकरण हेर्ने अधिकारीहरुको उपस्थिति रहेको थियो । प्रशिक्षणमा सम्पत्ति शुद्धिकरणका विषयबस्तुहरु, भिआईपीको प्रवेश र निर्देशिकामा उल्लेख भएको विषयवस्तुमा आधारित रहेर प्रशिक्षण दिइएको थियो । सम्पत्ति शुद्धिकरणबारे सुक्ष्म विश्लेषण गरेर बीमा गर्न पनि विभागले निर्देशन दिएको जनाइएको छ ।
