काठमाडौं । तिहारलाई लक्षित गर्दै पुष्प व्यवसायीहरुको छाता संघ फ्यानको आयोजनामा आगामी कात्तिक १ गतेबाट ललितपुरको जावलाखेलस्थित मैदानमा १३ औं पुष्प व्यापार मेला हुने भएको छ ।
फूलको व्यापार निकै हुने तिहारलाई लक्षित गर्दै फ्लोरिकल्चर एशोसिएसन नेपाल (फ्यान) ले पुष्प व्यापार मेला आयोजना गर्न लागेको जनाएको छ । यसवर्षको मेलामा बाहिरा देशबाट माउबोटका रुपमा आयत गरी उत्पादन विस्तार गरिएको करिब १६ नयाँ प्रजातीको गोदावरी फूलसहित सिजनमा फुल्ने सयपत्री, मखमली तथा अन्य सिजनल फूल राखिने कम्पनीले जनाएको छ ।
त्यस्तै गोदावरी पुष्प प्रतियोगितात्मक प्रदर्शनीको उद्देश्य पुष्प व्यवसायीहरुलाई व्यवसाय प्रवद्र्धनमा हौसला प्रदान गर्ने र व्यवसायीहरुबीच प्रतिस्पर्धा गराइ गुणस्तरीय उत्पादनमा टेवा पुराउनु रहेको संघले जनाएको छ ।
मेला ४ दिनसम्म चल्ने फ्यानका अध्यक्ष कुमार कसजुले जानकारी दिए । मेलामा ४४ वटा फूलको व्यवसायिक कारोबार गर्ने स्टल, ४ वटा सूचनामुलक र एउटा प्रतियोगितात्मक गरी ४९ वटा स्टल रहनेछन् ।मेलालाई शुक्रवार अर्थात् कार्तिक १ गते कृषिमन्त्री चक्रपाणी खनालले उद्घाटन गर्ने कार्यक्रम छ ।
