काठमाडौं । सिर्जना फाइनान्सको ६० प्रतिशत हकप्रदमा आवेदन दिने आज अन्तिम दिन रहेको छ । आज आइतबार (असोज ५ गते) सम्म कायम सेयरधनीले मात्र आवेदन दिन सक्नेछन् । कम्पनीले ६० प्रतिशत हकप्रद जारी गर्न सोमबार (असोज ६ गते) बुक क्लोज गर्दैछ ।
फाइनान्सले असोज १७ गतेबाट प्रतिकित्ता १०० रुपैयाँका दरले १०ः६ अनुपातमा कुल २७ लाख ६४ हजार ६९२ कित्ता हकप्रद सेयर निष्कासन गर्दैछ । यस हकप्रद सेयरमा कार्तिक २१ गतेसम्म आवेदन दिन सकिनेछ ।
रेटिङ एजेन्सी इक्रा नेपालले यस हकप्रदलाई औसत आधार जनाउने ‘ग्रेड ४’ रेटिङ दिएको छ । यसमा बिक्री प्रबन्धकको काम सनराइज क्यापिटलले गर्नेछ । सनराइज क्यापिटल, कमलपोखरी काठमाडौंबाट यस हकप्रदमा आवेदन दिन सकिनेछ । सिर्जना फाइनान्सका सम्पूर्ण कार्यालयहरुबाट पनि फारम पाइनेछ ।
यस्तै, सनराइज बैंकका शाखा कार्यालयहरु विराटनगर, पोखरा, वीरगञ्ज, बुटवल र नारायणगढ शाखाबाट पनि आवेदन दिन सकिनेछ । सी–आस्वा सदस्यता लिएका बैंक तथा वित्तीय संस्थाहरुबाट हकप्रद भर्न पाइने पनि कम्पनीले जनाएको छ । हकप्रद बिक्रीबाट प्राप्त हुने रकममध्ये तरलता कायम गर्न राष्ट्र बैंकमा कायम गरिने मौज्दात, लगानी र कर्जा प्रवाहमा खर्च हुनेछ ।
हाल सिर्जनाको चुक्ता पुँजी ४६ करोड ८ लाख १५ हजार रुपैयाँ छ । हकप्रद बिक्रीपछि पुँजी ७३ करोड ७३ लाख रुपैयाँ पुग्नेछ ।
