काठमाडौं । साताको अन्तिम दिन नेप्से दोहोरो अंकले घटेको छ । कर्मचारी सञ्चय कोष ५८ औं वर्षमा प्रवेश गरेको अवसरमा मंगलबार आयोजित कार्यक्रमलाई सम्बोधन गर्दै अर्थमन्त्री डा. युवराज खतिवडाले सेयर बजारमा लगानी गर्ने यो उपयुक्त समय भनेको २ दिनसम्म उछाल आएको बजार आज दोहोरो अंकले घटेको छ ।
मुलुकको अर्थतन्त्र सकारात्मक छ । लगानी वातावरण बन्दै गएको छ । आर्थिक वृद्धिदर राम्रो छ । राजनीतिक स्थायित्व कायम भएको छ । यसर्थ, यसबेला लगानीकर्ताले आत्तिनुपर्दैन अर्थमन्त्री डा. युवराज खतिवडाले भनेका थिए ।
अर्थमन्त्री डा. युवराज खतिवडाले लगानीको वातावरण राम्रो बन्दै आएको छ भनेको दुई दिनसम्म हरियाली भएको बजार आज १८ दशमलव १२ अंकले घटेर १,१५५ दशमलव ३० को विन्दुमा कायम भएको छ ।
आज म्युचल फण्ड र ट्रेडिङ बाहेक सबै उपसूचक घटेका छन् । सबैभन्दा धेरै जीवन बीमा समुह र निर्जीवन बीमा समुह १ सय ५ अंकले घटेका छन् ।
दिनभरिमा १ सय ६६ वटा कम्पनीको १२ लाख २४ हजार ५ सय ७२ हजार कित्ता शेयर खरिदविक्री हुँदा ३९ करोड ९९ लाख रुपैयाँको कारोबार भएको छ । सबैभन्दा धेरै शिवम् सिमेन्टको ५ करोड २४ लाख रुपैयाँको कारोबार भएको छ ।
त्यस्तै, प्रभु बैंकको २ करोड २६ लाख रुपैयाँ, सिद्धार्थ बैंक नेशनल माइक्रोफाइनान्स, नेपाल बैंक, नेपाल लाइफ इन्स्योरेन्स, नागरिक लगानी कोष र नबिल बैंकको १ करोडमाथिको कारोबार भएको छ । सबैभन्दा धेरै समता माइक्रोफाइनान्सका लगानीकर्ताले १० प्रतिशतका दरले कमाएका छन् भने सबैभन्दा धेरै गुराँस लघुवित्तका लगानीकर्ताले ८ प्रतिशतका दरले गुमाएका छन् ।
