काठमाडौं । १० दिन लामो प्रहरी हिराशतबाट रिहा भई सिधा कुरा जनतासँग नामक न्यूज २४ टिभीबाट पुनः प्रशारण गर्न नपाउँदै सञ्चारकर्मी लामिछानेका विरुद्धमा दायर भएको मुद्दा खारेज भएको छ । ‘सिधा कुरा जनतासँग’ कार्यक्रमका प्रस्तोता रवि लामिछाने र निलम्बित डिएसपी अंगुर जिसीविरुद्ध हालिएको अदालतको मानहानीको मुद्दा खारेज भएको हो ।
कञ्चनपुरकी किशोरी निर्मला पन्तको बलात्कारपछि हत्या भएको घटनामा सुरुवाती अनुसन्धान गरेका डिएसपी जिसी र पत्रकार खेम भण्डारीसँग कार्यक्रम प्रस्तोता रवि लामिछानेले एक टिभी अन्तर्वार्ता गरेका थिए । अदालतमा विचाराधिन मुद्दाको विषय र वादी प्रतिवादीलाई टिभी कार्यक्रममा बोलाएर मुद्दालाई प्रभावित पार्न खोजेको भन्दै दायर भएको रिट प्रारम्भिक सुनुवाईमै कञ्चनपुर जिल्ला अदालतले खारेज गरिदिएको हो ।
प्रमाण नष्ट गरेको र यातना दिएकोबारेको अभियोगमा जिल्ला अदालतमा कञ्चनपुरमा मुद्दा विचारधीन रहेकाले सार्वजनिक रुपमा बोल्न नमिल्ने र आफ्नो भाइ दिलिपसिंह विष्टलाई अभियोग लगाएको भन्दै उनका दाजुले खड्गसिंह विष्टले रवि र जिसीविरुद्ध मुद्दा दायर गरेका थिए । आज सोही उजुरीमा सुनुवाइ गर्दै जिल्ला अदालतका न्यायाधीश गोपालप्रसाद बास्तोलाको इजलासले श्रेस्तेदारकै निर्णय ठहर गरेको हो ।
