काठमाडौं । नेपाल राष्ट्र बैंकले मौद्रिक नीतिमार्फत बैंकका सिईओ तथा सञ्चालकलाई ६५ वर्ष र ७० वर्षे उमेर हद निर्धारण गरेपछि स्वतः पदमुक्त भएका प्राइम बैंकका प्रमुख कार्यकारी अधिकृत नारायणदास मानन्धर सर्बोच्च अदालत पुगेका छन् ।
नेपाल राष्ट्र बैंकले मौद्रिक नीतिलाई कार्यान्वयन गर्न ल्याएको एकीकृत निर्देशिकामार्फत बैंकका सञ्चालक तथा प्रमुख कार्यकारीका लागि उमेरको हद निर्धारण गरेपछि मानन्धर स्वतः पदमुक्त हुन पुगेका थिए ।
बैंक सञ्चालक समितिले गत साता मात्रै प्रमुख कार्यकारीमा नियुक्त गरेका मानन्धर शपथग्रहण समेत गर्न नपाई पद गएपछि नेपाल राष्ट्र बैंक र मौद्रिक नीतिका विरुद्धमा सर्वोच्च अदालतमा पुगेका हुन् ।
राष्ट्र बैंकले मौद्रिक नीतिमार्फत राष्ट्र बैंकले प्रमुख कार्यकारी ६५ वर्षभन्दा माथि बढीको हुनु नहुने र यदि उक्त निर्देशन जारीअघि नियुक्त भए ६९ वर्ष पुगेपछि स्वतः पदमुक्त हुने र ७० वर्ष पुगेको व्यक्ति सञ्चालक पदमा नियुक्त हुन नसक्ने व्यवस्था गरेको छ । सो व्यवस्था अनुसार एभरेष्टका सञ्चालक बिके श्रेष्ठ समेत पदमुक्त भएका छन् ।
