प्रभु बैंकले आर्थिक वर्ष २०७५।७६ को वित्तीय विवरण प्रकाशित गरेको छ । प्रभुले चौथो त्रैमाससम्ममा २ अर्ब ५ करोड ५ लाख ६४ हजार रुपैयाँ नाफा कमाएको छ । अघिल्लो आर्थिक वर्षको सोही अवधिको तुलनामा बैंकको नाफा १ सय १२ प्रतिशतले बढी हो । अघिल्लो वर्ष यसै अवधिमा बैकले ९६ करोड ७० लाख रुपैयाँ मात्र खुद नाफा कमाएको थियो ।
बैंकले चौथो त्रैमाससम्ममा १ खर्ब १२ अर्ब रुपैयाँ निक्षेप संकलन गरी ८६ अर्ब ४१ करोड रुपैयाँ कर्जा प्रवाह गरेको छ । बैंकले कर्जा प्रवाहमा १८ प्रतिशतले बृद्धि गरेको हो भने निक्षे संकलनमा १६ प्रतिशतले बृद्धि गरेको हो ।
बैंकले आर्थिक वर्षको चौथो त्रैमासको अवधिमा आइपुग्दा १४ प्रतिशतले सञ्चिती बढाएको छ । बैंकले खुद ब्याज आम्दानी, सञ्चालन नाफा लगायत अन्य महत्वपूर्ण सूचकहरुमा पनि आकर्षक सुधार गरेको छ ।
