काठमाडौं । सिडिएससीले अबैज्ञानिक तरिकाले पुँजिगत लाभकर असुल गर्न थालेको विरोधमा राजधानी बाहिरका शेयरलगानीकर्ताहरु पनि आन्दोलित भएका छन् । प्रदेश पाँच शेयर लगानीकर्ता फोरम पनि सिडिएससीका विरुद्धका आन्दोलनमा ऐक्यबद्धता जनाएको छ ।
बुटवल मुख्य कार्यालय रहेको प्रदेश पाँच शेयर लगानीकर्ता फोरमका उपाध्यक्ष गोपी राज भुषालले शनिबार एक प्रेस बिज्ञप्ति जारी गर्दै सिडिएससीको कर गणना विधिको विरोध जनाएका हुन् । सो संघले सिडिएससीले लागू गरेको भारित गणना विधि तत्काल खारेज गरी वैज्ञानिक र यथार्थपरक गणना विधिद्वारा गणना गर्ने व्यवस्था मिलाउन माग गरेका छ ।
बिज्ञप्तिमा भनिएको छ, ‘साउन १ गतेदेखि सिडिएससीले लागू गरेको पुँजिगत लाभकर गणना विधि हामी लगानीकर्ताहरु माँझ प्रयोगमा ल्याउन खोजिएको छ । जुन अत्यन्तै झन्झटिलो, अव्यवहारिक र त्रुटीपूर्ण रहेको छ । यसै सन्दर्भमा सिडिएससीको निर्देशनले हामी लगानीकर्ताहरुको मनोवल र पुँजिबजारप्रतिको सकारात्मक सोचलाई निस्तेज पार्ने निश्चित छ ।’
बिज्ञप्तिमा केन्द्रीय संघहरुले गरेको आन्दोलनमा ऐक्यबद्धता जनाएको उल्लेख छ ।
