काठमाडौं । सिटिजन्स लाईफ इन्स्योरेन्स कम्पनीमा बैदेशिक रोजगार बीमा गरेका मध्ये ३५ जनाको विदेशमा काममा रहेकै बखत मृत्युवरण गरेका छन् । मृतकका आश्रित परिवारलाई कम्पनीले चार करोड २२ लाख रुपैयाँ बीमा दावी भुक्तानी गरेको छ ।
सिटिजन लाईफ इन्स्योरेन्स कम्पनीको तथ्याङक अनुसार वैदेशिक रोजगार बीमा गरी रोजगारीको सिलसिलामा विदेश गएका मध्ये ३५ जनाको मृत्यु भएको र ११ जना विभिन्न दुर्घटना वा अन्य कारणले अशक्त हुन पुगेको जनाएको छ । कम्पनीले वैदेशिक बीमा अन्तर्गत शारिरीक अशक्तता भएका बीमीतको ११ लाख ८१ हजार रुपैयाँ भुक्तानी गरेको छ ।
वैदेशिक रोजगार अन्तर्गत घातक रोग लागेका आठ जनालाई ४० लाख रुपैयाँ भुक्तानी गरेको छ । वैदेशिक रोजगार अन्तर्गत जम्मा ५४ जना बीमितको दाबी भुक्तानी गरेको कम्पनीले जनाएको छ । साथै, सिटिजन लाइफ इन्स्योरेन्स कम्पनीले मृत बिमितको ३० लाख ५१ हजार रुपैयाँ भुक्तानी गरेको छ । कम्पनीले ८ जना मृत बिमितको रकम भुक्तानी गरेको हो ।
कम्पनीले स्थापनाकालदेखि हालसम्म ६२ जना विमितलाई दाबी भुक्तानी गरिसकेको छ । सिटिजन लाईफ इन्स्योरेन्सका प्रमुख कार्यकारी अधिकृत (सिईओ) पोषक राज पौडेलले जीवन बीमाको बजारमा पछिल्लो समय दाबी भुक्तानीमा कुनै समस्या नरहेको उनले बताए ।
