सिद्धार्थ इन्स्योरेन्सको हकप्रद शेयरमा आवेदन दिने आज अर्थात् आइतबार अन्तिम दिन रहेको छ । सिद्धार्थले चुक्ता पूँजीको ३५ प्रतिशत हकप्रद सेयर असार १७ गतेदेखि बिक्रीमा ल्याएको थियो । सिद्धार्थ इन्स्योरेन्सले चुक्ता पूँजीको ३५ प्रतिशतले हुने २२ लाख ४४ हजार ९७३ कित्ता हकप्रद बिक्री गरेको हो ।
कम्पनीले हकप्रद प्रयोजनका लागि जेठ १ गते सेयरधनी किताब बन्द गरेको थियो । यस अनुसार बैशाख ३१ गतेसम्म कायम रहेका सेयरधनीले मात्र हकप्रदमा आवेदन गर्न पाउनेछन् ।
सिद्धार्थ इन्स्योरेन्सको बिक्री प्रबन्धकमा एनएमबि क्यापिटल रहेको छ । सेयरधनीले मेरो सेयर, बिक्री प्रबन्धक एनएमबि क्यापिटल नागपोखरी, एनएमबि बैंकको शाखा,गुडविल फाइनान्स, सेन्ट्रल फाइनान्स र कामना सेवा विकास बैंक ज्ञानेश्वरबाट समेत आवेदन गर्ने व्यवस्था गरिएको छ ।
हाल ६४ करोड १४ लाख २१ हजार रुपैयाँ रहेको सिद्धार्थ इन्स्योरेन्सको हकप्रदपछि कम्पनीको ८६ करोड ५९ लाख १८ हजार रुपैयाँ चुक्ता पूँजी पुग्नेछ । बीमा समितिले तोकेको पूँजी १ अर्ब कायम गर्न कम्पनीलाई १३ करोड ४१ लाख पूँजी बढाउनुपर्नेछ, बाँकि पुंजी बोनश शेयरबाट पुरा गर्ने योजना कम्पनीको रहेको छ।
