अभिकर्ता फकाउन दिएको कर्जा भुक्तानी नभएपछि बीमा कम्पनीहरु तनावमा

काठमाडौ: जीवन बीमा कम्पनीहरूले अभिकर्तालाई फकाउन दिएको कर्जा भुक्तानी हुन नसकेपछि कम्पनीहरु तनाबमा परेका छन् । अभिकर्तालाई फकाउन कम्पनीहरुले जथाभावी ऋण प्रवाह गरेपछि भुक्तानी नै नहुने समस्या देखिन थालेको हो ।

जीवन बीमा कम्पनीहरूले अभिकर्ताको लागि समयसमयमा विभिन्न खालका ऋण तथा सापटी योजना सञ्चालन गर्दै आएका छन् । जसअन्तर्गत अधिकांश कम्पनीले घर, कार, मोटरसाइकल, ल्यापटप, कम्प्यटर र मोबाइल कर्जाका साथै नगद कर्जासमेत प्रदान गर्दै आएका छन् ।

यसरी कम्पनीहरूले प्रदान गर्ने कर्जा अभिकर्ताको कार्य सम्पादनमा आधारित हुन्छ । अर्थात् अभिकर्ताको तत्काल पाकेको कमिसन र आगामी दिनमा नवीकरण बीमाबापत प्राप्त हुन सक्ने कमिशनलाई आधार मानी कम्पनीहरूले कर्जा प्रदान गर्दै आएका छन् । समितिले अभिकर्तालाई कर्जा उपलब्ध गराउने व्यवस्था नगरे पनि व्यवसाय प्रवद्र्धनका लागि भन्दै कम्पनीले ऋण दिँदै आएका छन् । तर, कम्पनीहरूले मनपरी ऋण प्रवाह गर्न थालेपछि कम्पनीहरु आफै मर्कामा परेका छन् ।

अभिकर्तालाई प्रेरित गर्नका लागि कर्जा दिनु उपयुक्त भए पनि पछिल्लो समयमा कम्पनीहरूले जथाभावी कर्जा प्रवाह गरेको र कर्जा असुल उपर हुने क्रम घटेको समितिले बताएको छ । कम्पनीहरूले अभिकर्तालाई आकर्षित गर्न विभिन्न खालका योजना सञ्चालन गर्ने र कर्जा लिई सकेपछि अभिकर्ताहरू सम्पर्कविहिन हुने गरेको समेत समितिले बताएको छ ।

नेपालमा हाल १८ वटा जीवन  बीमा कम्पनी छन् । नौ वटा कम्पनी गत आवदेखि नै सञ्चालनमा आएका हुन् । पुराना कम्पनीभन्दा पनि नयाँ कम्पनीहरूमा यस्तो खालको समस्या झनै विकराल हुन सक्ने देखिएको छ । विगतको समयमा गुराँश लाइफ, एशियन लाइफ, सूर्या लाइफ र प्राइम लाइफ इन्स्योरेन्स कम्पनीले ऋण असुल नहुने समस्या भोगेको समितिले बताएको छ ।

प्रतिक्रिया दिनुहोस्

सम्बन्धित समाचार