जेठभित्र माथिल्लो तामाकोसीको सेयर निष्कासन हुने

Citizen Life Insurance Co

अप्पर तामाकोसी हाइड्रो पावर कम्पनीले आगामी जेठभित्र आयोजना प्रभावित स्थानीय र सर्वसाधारणका लागि सेयर निष्कासन गर्ने तयारी गरेको छ । दोलखामा निर्माणाधीन ४ सय ५६ मेगावाटको माथिल्लो तामाकोसी जलविद्युत् आयोजनामा लगानी गर्न स्थानीय र सर्वसाधारणका लागि छुट्याइएको २५ प्रतिशत सेयर निष्कासन गर्न लागिएको हो ।

नेपाल धितोपत्र बोर्डबाट वैशाखभित्र स्वीकृति प्राप्त भएमा जेठबाट स्थानीयको १० र सर्वसाधारणको १५ प्रतिशत सेयर बिक्री खुल्ला गरिने कम्पनी सचिव रामसुन्दर श्रेष्ठले बताए । उनका अनुसार आयोजना प्रभावित स्थानीयका लागि ९१ अर्ब ५ करोड ९० लाख रुपैयाँ बराबरको १ करोड ५ लाख ९० हजार कित्ता जारी हुनेछ ।

यस्तै, सर्वसाधारणका लागि ९१ अर्ब ५८ करोड ८५ लाख रुपैयाँ बराबरको १ करोड ५८ लाख ८५ हजार कित्ता सेयर बिक्री खुल्ला हुनेछ । स्थानीयलाई अतिप्रभावित, प्रभावित र कम प्रभावित गरी ३ श्रेणीमा विभाजन गरेर सेयर वितरण गरिनेछ । गौरीशंकर गाउँपालिकाको लामाबगर र गोंगर अतिप्रभावित, प्रवेश मार्ग तथा प्रसारण लाइनले छोएको प्रभावित र कतै नछोइएको क्षेत्रलाई कम प्रभावितमा राखिएको छ । स्थानीयले ३० देखि ३ सय कित्तासम्म सेयर खरिद गर्न आवेदन दिन सक्नेछन् । कूल परेको आवेदनको आधारमा ३ प्रतिशत अतिप्रभावित, १४ प्रतिशत प्रभावित र १ प्रतिशत सेयर कम प्रभावितलाई वितरण गरिनेछ । प्राप्त आवेदनका आधारमा सेयर बाँडफाँडको टुङ्गो लाग्ने कम्पनीले जनाएको छ ।

चालू आर्थिक वर्षको सुरुमा स्थानीयलाई छुट्ट्याइएको सेयर जारी गर्ने तयारी गरे पनि स्थानीय तहको निर्वाचनपछि जिल्ला समन्वय समिति गठनमा भएको ढिलाई र धितोपत्र बोर्डको नियमावली संशोधन हुँदा समय लम्बिएको हो । यसअघि चैतभित्र सेयर जारी गरी वैशाखसम्म बाँडफाँड गर्ने योजना थियो । सुरुमा स्थानीय र पछि सर्वसाधारणका लागि १५ प्रतिशत सेयर निष्कासन हुनेछ ।

कम्पनीले यसअघि कर्मचारी सञ्चय कोषमा रकम जम्मा गर्ने सञ्चयकर्ता, नेपाल विद्युत प्राधिकरणका कर्मचारी, आयोजनामा ऋण लगानी गर्ने संस्थाका कर्मचारीका छुट्ट्याएको २४ प्रतिशत सेयर बाँडफाँड गरिसकेको छ । सञ्चयकर्ता, ऋण लगानी गर्ने संस्था, प्राधिकरणका कर्मचारी र स्थानीयका लागि सेयर जारी गर्न बोर्डबाट एकै पटक स्वीकृति लिइएको थियो ।

तर, रोल्वालिङ खोलाको पानी मिसाएर थप विद्युत् उत्पादन गर्ने योजनापछि स्थानीय र सिभिल ठेकेदार सिनो हाइड्रोमा कार्यरत कर्मचारीले पनि सेयर पाउनुपर्ने भन्दै विरोध गरेका थिए । विरोधका कारण त्यतिबेला स्थानीयका लागि छुट्ट्याइएको सेयर निष्कासन रोकिएको थियो । समयमा निष्कासन नहुँदा कम्पनीको पुँजी परिचालन र आयोजनाको खर्च व्यवस्थापनमा समस्या सुरु भएको छ । सेयर जारी गरेर २ अर्ब ६४ करोड ७५ लाख रुपैयाँ जम्मा गर्ने कम्पनीको लक्ष्य छ ।

(श्रोत:-उर्जा खबर बाट)

प्रतिक्रिया दिनुहोस्

सम्बन्धित समाचार