चुक्ता पुंजी बढाउने कसरतमा नेपाल इन्स्योरेन्सले शतप्रतिशत सगै फेरि प्रस्ताव गर्याे ६५ प्रतिशत हकप्रद

काठमाडौँ चैत २२: बैशाख ५ गतेदेखि शतप्रतिशत हकप्रद जारी गर्न लागेको नेपाल इन्स्योरेन्स कम्पनीले हकप्रद जारी नहुँदै फेरि थप ६५ प्रतिशत हकप्रद जारी गर्ने निर्णय गरेको छ । कम्पनीले शतप्रतिशत हकप्रद र बोनसपश्चात कायम हुने चुक्ता पूँजी ६१ करोड ७६ लाखको ६५ प्रतिशत हकप्रद जारी गर्ने जनाएकाे हाे ।

कम्पनी सञ्चालक समितिको चैत २१ गते बसेको बैठकले थप ६५ प्रतिशत हकप्रद विक्री गरेर बीमा समितिले तोकेको चुक्ता पूँजी कायम गर्ने निर्णय गरेको हो ।

सोही बैठकले आगामी बैशाख २१ गते इन्स्यारेन्सको ६९ औं बार्षिक साधारण सभा आह्वान गरेको छ । सभाका लागि कम्पनीले बैशाख ७ गते सेयरधनी किताब बन्द गर्ने भएको छ । यसअनुसार बैशाख ६ गतेसम्म कायम रहेका सेयरधनीले शतप्रतिशत हकप्रदले समेत पाउने गरि प्रस्ताव गरेको २.२६ प्रतिशत बोनस प्राप्त गर्न र सभामा सहभागि हुन पाउनेछन् ।

हाल कम्पनीको चुक्ता पूँजी ३० करोड १९ लाख ८८ हजार रुपैयाँ रहेको छ । कम्पनीले बैशाख ५ गतेदेखि जारी गर्ने एक बराबर एक अनुपातको हकप्रद र प्रस्तावित एक करोड ३६ लाख ६१ हजार बोनस पूँजीकरण गर्दा कम्पनीको चुक्ता पूँजी ६१ करोड ७६ लाख ३८ हजार पुग्नेछ ।

यहि पूँजीको ६५ प्रतिशत हकप्रद जारी गरेर कम्पनीले बीमा समितिले निर्जीवन बीमा कम्पनीलाई कायम गर्न दिएको चुक्ता पूँजी कायम गर्न लागेको हो । कम्पनीको सेयरमूल्य बुधबार प्रतिकित्ता ८५० रुपैयाँमा कारोबार भएको थियो ।

प्रतिक्रिया दिनुहोस्

सम्बन्धित समाचार